主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6991
地產新聞
樓市出更:超豪宅旺爆 加價翻拍
(太陽) 2015年8月19日
近期一、二手豪宅市道熱爆,超級洋房更加有價有市,搞到部分喺市場多時仲未賣出嘅銀主盤都攞出嚟翻拍。好似舊年曾經拍賣過四次嘅西半山羅便臣道1號一個3層複式戶,將於喺下個星期推出拍賣,今次開價7,500萬元,比舊年底開拍價仲高咗一成。

將會喺今個月二十六號透過卓先拍賣嘅羅便臣道1號21、22及23樓複式S室,實用面積3,003方呎,平台498方呎,以開價7,500萬元計,實用呎價2.5萬元。

呢個單位最初喺舊年三月以9,800萬元推出拍賣,其後多番調低開拍價,但始終未能賣出,到去年底開拍價一度低到6,800萬元。可能由於近期豪宅市況好咗,銀主對個市有信心,所以調高咗個開拍價。

金麗閣破冰2228萬沽

其實,近期特色戶承接力都唔錯,中原陳楚婷話,已經有超過一年無成交嘅西半山金麗閣,啱啱有一個高層連平台特色戶賣出,個單位實用面積963方呎,平台約566方呎,望海景,以2,228萬元連車位及租約易手,實用呎價約2.31萬元。

該行歐陽振邦話,西九四小龍屋苑今個月暫時有約12宗交投,其中宇晴軒佔半數,最近有個6座低層G及H室,實用面積共950方呎,以1,428萬元賣出,實用呎價約1.5萬元。

美聯楊念萱話,奧運站維港灣3座高層H室,實用面積約645方呎,由用家以約1,080萬元買入,實用呎價約1.67萬元。

其實人民幣貶值,刺激咗部分內地資金嚟香港買樓避險,相信會催化高價豪宅交投進一步轉活。

半億買賣年內272宗

中原董事劉瑛琳同劉Sir講,今年初至今,一、二手市場已經有272宗樓價逾5,000萬元嘅住宅成交,涉額共366億元,金額創咗過去十五年首三季新高。

佢又話,好似佢哋促成嘅尖沙咀The Austine Place頂層兩伙特色戶成交,買家係一個持有香港永久居民身份證嘅內地商人。興勝項目管理董事周嘉峰話,呢個盤頂層兩伙的成交呎價由4萬至4.2萬元,創項目新高,而成個物業到依家累售26伙,佔可售單位約68.4%,套現逾5.4億元。

另一方面,長實地產(01113)嘅紅磡維港.星岸,昨日都賣咗兩伙,其中1座19樓A單位,實用面積1,387方呎,成交價3,480.9萬元,實用呎價25,097元,發展商今日會公布項目最新嘅部署。

劉Sir