主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7420
地產新聞
樓市出更:新盤旺 加價1成不手軟
(太陽) 2015年8月14日
樓市氣氛同天氣一樣熱辣辣,發展商狂推高價特色戶搶客。恒地(00012)下周一加推長沙灣曉珀12伙發售,昨日率先更新價單,部分單位加價約4%,其中有個頂樓連天台特色戶,價單售價同呎價分別加到3,555萬同27,515元,呎價相信可挑戰同區新高,連埋削減優惠,今次足足變相加價高近一成。另新地(00016)東涌東環昨日賣咗全幢低座特色戶,成交價5,510萬元。

睇番一手銷售資訊網資料,曉珀昨日更新價單,部分單位加咗價,其中35樓頂層連天台A室特色戶,實用面積1,292方呎,價單售價由3,418.3萬元加到3,555萬元,加幅約4%,實用呎價由26,457元加到27,515元,挑戰同區新高之餘,直情拍住何文田豪宅新盤價。

仲有,曉珀同時將即供折扣由原本售價最高減4%削減到1%,兼且取消埋成交價3%從價印花稅現金回贈,呢次夾夾埋埋合共變相加價高近一成。

駿岸柏匯預告提價

恒地營業(一)部總經理林達民同劉Sir講,同系馬鞍山迎海第4期迎海.駿岸,截至昨日下晝已經有184張入票,超額認購約2.7倍,反應相當理想,最快日內加推單位喺下周五首日開盤時一齊賣,加推梗係有加價空間。同系筲箕灣柏匯已錄到423張入票,超額認購4.6倍,有機會明日開售後加推單位,當然亦都有加價空間。

事實上,近排新盤特色戶好旺場,新地東環昨日賣出全幢低座特色戶,有買家大手購入2號住宅大樓全數5伙,成交價5,510萬元,估計創咗東涌最大額全幢成交紀錄,折合實用呎價逾1.7萬元。

囍滙2期可睇現樓

另太古地產(01972)亦都上載西半山瀚然特色戶新銷售安排,推出49樓A及49樓B室兩伙招標,今個月二十四日截標,兩伙指引價分別係8,200萬同6,500萬元,呎價46,223元同45,742元。

新世界(00017)元朗蔚林洋房開咗畀人預約參觀後,暫錄逾40組準買家睇樓,下周一起首度發售8號同9號洋房。信置(00083)等灣仔囍滙第二期現樓已接受預約參觀,第2座47樓A單位實用面積為1,147方呎,大廳同主人套房都睇到維港海景。

劉Sir