主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6472
地產新聞
樓市出更:舖市冷鋒 逾億大刁縮半
(太陽) 2015年8月13日
今年本港經歷零售寒冬同港股大時代極速玩完,令到大額工商物業承接力都受到影響。今年初到七月,市場只得98宗超過億元嘅工商舖買賣,加埋總值約莫232.48億元,按年分別跌咗3%及39%。當中以逾億元商舖最傷,成交金額大跌逾50%,得番61.61億元,成交量只得31宗,跌幅都有逾40%。韋堅信測量師行發展及投資董事許偉國估計,下半年舖價相信都會受到減租潮影響跌10%,屆時交投或會按季倍升。

劉Sir睇番韋堅信測量師行資料,今年頭七個月,逾億元舖位成交同金額都出現大跌,分別只得31宗同61.61億元,比舊年同期跌咗43.6%及53.4%。

零售淡 投資者拒接貨

同期逾4億元的舖位成交亦僅有4宗,逾10億元成交欠奉。期間最大額舖位係置富產業信託(00778)喺二月以6.48億元賣出葵涌盈暉薈商場。

而今年截至七月,市場仍然未有出現逾10億元大刁,許偉國話,投資者喺零售業前景未明朗之下,即使舖價輕微回落都唔敢接貨,但隨着下半年美國將會加息,估計買家會把握機會入市。
寫字樓成交 量升價跌

而上半年減租潮帶嚟嘅影響,將會反映喺下半年嘅舖價,到時估計核心區舖價會跌10%,但交投有機會按季倍升。

至於寫字樓方面,今年頭七個月逾億元成交有46宗,總成交額共115.42億元,按年分別升70.4%及跌39.2%,出現量升價跌現象。期內較矚目成交包括燈芯絨大王江達可以9.98億元沽咗長沙灣百佳商業中心全幢;而卓能集團(00131)嘅灣仔卓能廣場全幢亦都以7.9億元賣出。

許偉國仲話,期內中環皇后大道中九號同環球大廈呎價都創咗新高,到依家呎價都維持喺高水平徘徊,不過,受到分拆項目減少影響,令到成交金額跌咗,下半年看好區內同銅鑼灣乙級商廈呎價可以追落後。

工廈方面,逾億元嘅工廈成交宗教有約21宗,比舊年同期分別多咗10.5%,但成交金額就跌咗6.1%,得番55.45億元,其中,葵涌威信物流中心全幢以9.338億元賣出。另外,今年罕有地出現巨額酒店成交,尖沙咀洲際酒店以72億元賣出,創咗全港最大宗酒店物業成交。

劉Sir