主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6010
地產新聞
樓市出更:十官舍唔執輸 3億推拍
(太陽) 2015年8月12日
產業署近年不斷攞啲空置宿舍出嚟拍賣,喺缺盤嘅情況下,反應都唔錯。有測量師行老友同劉Sir講,嚟緊八月二十五日會攞新一批共10個豪宅拍賣,今次仲首次有中半山麥當勞大廈單位攞出嚟,開價4,110萬元,而今次開價都跟隨大市升咗,好似薄扶林碧瑤灣有個43座單位,連車位開價3,160萬元,比起今年二月拍賣嘅42座單位開價高出12.9%,而加埋成批單位開價超過3億元。

美聯測量師行董事林子彬同劉Sir講,今年豪宅市場追落後,所以需求都相當殷切,而今次係佢地第八次幫產業署搞豪宅拍賣會。

麥當勞大廈開價4110萬

佢話,除咗之前都有單位推出嘅薄扶林碧瑤灣、碧林大廈、翠海別墅、大坑愉富大廈之外,今次價值最大碼係以首度加入嘅麥當勞大廈2字樓A室,連車位開價4,110萬元,以實用面積約2,302方呎計,實用呎價約1.79萬元。

今次呢批單位,開價比今年二月時同類單位都有升到,好似薄扶林碧瑤灣43座25字樓連兩個車位,開價3,160萬元,比起今年二月拍賣嘅42座26字樓連兩車位開價2,800萬元高咗約12.9%。

不過,睇番上次情況,最後42座單位承價去到3,420萬元先賣出,所以計落今次開價都仲係幾吸引。今次最平係碧瑤灣44座2字樓及1個車位,實用面積2,079方呎,開價2,430萬元,實用呎價1.17萬元。

天晉特色戶四年賺27%

講番今個月市況,由於換樓意欲回升,所以一啲中價大戶承接力都唔錯。香港置業黃偉傑表示,將軍澳天晉1期7座高層A室「水晶戶」,四房包括兩套房間隔,所以有個帝景灣向隅客以約2,100萬元買入,以實用面積約1,108方呎計,實用呎價約18,953元,單位約四年升值27%。

用家主導,一啲比較實用嘅二線樓承接力都唔錯。中原程楚茵話,樓齡近三十年嘅西半山豐樂閣,有個中層實用面積約1,367方呎B室,以2,000萬元賣出,實用呎價約14,631元,單位約三年升咗19%。

世紀21北山嚴智贇話,銅鑼灣海倫大廈有個中層C室三房單位,實用面積984方呎,由區外換樓人士以1,650萬元買入。

劉Sir