核心區舖位減租潮持續，業主不再企硬，銅鑼灣恩平道交吉多月的街舖業主面對現實，將每月租金調低至80萬元，較該舖舊租仲要低約16%。另外，投資者蔡志忠同劉Sir講，最近佢又聯同陳秉志及羅珠雄，以1,900萬元掃咗屯門區新墟青桃徑一個舖位，呎價僅4,750元，相信係近年呎價最低嘅舖位成交。
美聯旺舖王蕾話，恩平道44至48號恩平中心地下1及2號舖，面積約790方呎，原租客係一間鐘錶店，已交吉三個月，原先叫租95萬元，同舊租一樣，但依家減至80萬元，呎租約1,013元，足足低咗16%，反映近日零售市道下滑，區內業主都願意跟隨市況調整租金。
另物業投資者蔡志忠同劉Sir講，佢再次聯同陳秉志及羅珠雄一齊入市，以低價1,900萬元掃咗屯門青桃徑一個舖位，個舖本來開價2,500萬元，但就唔知係咪同近日股市麻麻，業主竟然肯平價賣出，佢又話個舖面積都算大，會考慮拆細賣番出去。
宏安旺角地盤嗌6.2億
個舖位係青桃徑一個單號地舖，面積約4,000方呎，呎價只係4,750元，可以話係近年最低呎價嘅舖位成交個案，依條街地舖呎價一般都要8,000至9,000元，咁樣計法，今次成交呎價平咗近一半。
反而市區商業項目地仍然好旺，第一太平戴維斯周鎮邦話，由宏安（01222）持有嘅旺角彌敦道575至575A號商業地盤推出標售，佔地約2,130方呎，可重建為酒店、商廈或銀座式商廈，意向價約6.2億元，截標日期八月二十八日。
東角中心逾億元放售
該行袁志光又話，上環新紀元廣場（低座）寫字樓25樓連兩個車位標售，面積約15,451方呎，意向價4.1億元，截標日期九月十五日。
中原寫字樓部黃海燕話，銅鑼灣銀座式商廈東角中心11樓03至08室，約4,343方呎，以呎價2.38萬元放售，涉1.03億元，原業主去年以呎價1.8萬元購入。消息稱，中環長江集團中心中層單位，面積1,820方呎，以呎租150元租出，屬近期高價。
劉Sir
App下載
