主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7843
地產新聞
樓市出更:萬三樓花等批 兩年最多
(太陽) 2015年8月7日
新盤供應急增,睇番地政總署資料,原來上個月共有5個住宅新盤入紙申請預售樓花,加埋有成3,024伙,當中包括中國海外(00688)九龍啟德兩個「港人港地」項目啟德一號等,令到待批預售住宅單位增至13,235伙,創咗二十五個月新高。另長實地產(01113)紅磡維港.星岸昨日未賣先加推54伙,恒地(00012)筲箕灣柏匯亦估計日內開價。

地政總署昨日出咗上月預售樓花同意書資料,劉Sir睇到,原來上個月有5個新盤一齊入紙申請預售,好似中國海外曾經透露計劃喺今年第四季開售嘅啟德一號,共提供1,169伙,預計二○一七年八月底落成。上個月仲有信置(00083)嘅西貢沙角尾項目同埋會德豐地產嘅何文田項目入紙申請預售,分別提供274與561伙。

截至到上個月尾,共有26個住宅新盤等緊批預售樓花,涉及13,235伙,創咗超過兩年以來新高;同時亦都有4個住宅新盤獲批預售樓花同意書,共涉1,165伙,當中包括房協嘅長沙灣喜薈、喜漾同埋宏基資本(02288)嘅尖沙咀匯萃等。

MOUNT PAVILIA趕末季賣

美聯劉嘉輝話,今年頭七個月新申請預售樓花嘅住宅項目共有22個,涉及12,791伙,比起舊年全年11,536伙仲要多,勢創三年新高。喺地政總署資料睇到,新世界(00017)清水灣道項目改咗名做MOUNT PAVILIA,仲申請緊預售樓花同意書,預計第四季賣樓。

柏匯最快日內開價

另外,維港.星岸未開售已經急不及待加推,昨日原價加推54伙,價單平均呎價27,575元,折實平均呎價23,163元。呢個盤全新三房示範單位昨日開畀傳媒同代理睇。長實地產投資董事郭子威話,明日就會正式開放示範單位畀客睇,因應家庭客需要,落實安排大手認購3伙同2伙買家優先揀樓。呢個盤部分高層A、B單位將鎖定以兩伙形式一同發售,形式類似同系樓盤「1+親」安排,但強調係富貴版。

恒地營業(一)部總經理林達民話,柏匯日內有機會開價,月內推售,示範單位今開放予代理參觀,同日有機會開畀恒地會會員參觀。同系馬鞍山迎海第4期迎海.駿岸唔排除未來一周上樓書。

劉Sir