喺一周一行同內地旅客消費力大減雙重影響下，市場終爆發近十年最大規模嘅地舖放頂租潮，一線街至少有約莫9宗放頂租個案。尖沙咀漢口道嘅本地珠寶行，遇正零售寒風，營業唔夠一年就以月租50萬元放頂租。零售業界老友估計，由珠寶鐘錶或者國際品牌租用嘅舖位，租金有機會大跌五成。
零售業進入寒冬期，市場出現商戶頂租潮，劉Sir聽聞，一間原本喺尖沙咀加拿分道租舖經營近八年嘅本地珠寶行，舊年底就升級轉戰同區一線街，以約45萬元租咗漢口道一個面積約1,050方呎舖位，比舊舖位月租高超過3倍，但近幾個月零售業大吹冷風，近期以月租50萬元放頂租。
北京道舖低1成求客
珠寶店林立嘅海防道，最近都罕有咁出現地舖推頂租，其中單號地下A及B號，面積約1,600方呎，兩年前由連鎖鐘錶店簽咗兩年死約同兩年生約，首兩年每月約170萬元，隨後兩年約190萬元，但零售市道唔好，近日以約190萬元放頂租。
租客放頂租，業主亦要降低叫租吸客，好似同區北京道漢口中心地下一個舖位，面積約600方呎，叫租由早前的120萬減至90萬元，比現時租金低約莫10%。
廣東道放頂租無人吼
自從四月份起，銅鑼灣、中環、尖沙咀及旺角等區一線街，已經至少有約9宗放頂租個案，去到今日，大部分都仲未搵到人頂租。
就好似尖沙咀廣東道四月份連環出現兩間高檔零售商戶放頂租個案，租客分別係連鎖鐘錶店同高級眼鏡店，但依家都未成功頂租。
六福（00590）主席兼行政總裁黃偉常話，近月核心區個零售氣氛好差，早前已經有部分國際品牌表明會同業主傾吓啲租金，佢哋旗下分店都唔例外，每間正商討減租嘅舖位，減幅間間唔同，介乎10至20%，預計今年核心區舖租會有機會大幅下調，部分由珠寶鐘錶或國際品牌租緊嘅舖位，租金有機會大跌五成。
劉Sir
App下載
