主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8204
地產新聞
樓市出更:摸王頻走貨 平賣收租盤
(太陽) 2015年7月31日
樓市狂升,幾經樓市風浪嘅投資者都難抵大市誘惑,近排急急沽貨套現,有「摸王」之稱嘅資深投資者黎汝遠,今年原來已經沽咗近半億住宅及車位,近排就以約1,365萬元賣出最後一個北角城市花園收租單位,唔計收咗嘅租金,件貨五年內帳面賺495萬元。

劉Sir老友名采策略姚雲龍話,今次黎汝遠賣咗嘅單位係城市花園4座中層B室,係則王單位,實用面積942方呎,望到少少東九龍海景,摸王一○年買返嚟收租,一路以1,430萬元進取叫價放盤,近排咁啱有客出價,「輕輕」減咗65萬元,以1,365萬元賣出咗,比依家市價低約5%,實用呎價14,490元,佢揸咗件貨五年內帳面賺495萬元。

年內累套近半億

其實摸王近排都密密手出貨,上個月先賣咗個城市花園單位,套現咗1,680元,而家又再沽一間,連同其他單幢樓同車位,佢今年已經賣咗4個單位同3個車位,套現咗逾4,660萬元。

聽代理又講,摸王已經賣晒城市花園同同區和富中心啲收租單位,手上剩番啲單幢樓仔未賣,但都有租收,估計唔好價都唔會賣。其實買磚頭收租穩陣,唔少投資者近排都買樓收租,好似今次城市花園接貨嘅都係收租客。

浪翠車位107萬新高

最近,北角區指標屋苑頻頻錄到理想價成交,亞洲地產辛麗璇講,同區嘅城市花園錄到同類高價,個單位係2座高層E室,以約1,138萬元賣出,實用呎價約14,102元。

另外,美聯佘錦驊都講,西灣河逸濤灣2座低層D室,實用面積約862方呎,外區投資者睇好港島東租務市場潛力,以1,570萬元接貨,實用呎價約18,213元,若果以同類單位月租約莫4.8萬元計,租金回報率約莫有3.7厘。

除咗買樓收租,買車位都係投資者「新玩意」,一來無辣招稅成本低、二來有需求升得快。睇下土地註冊處資料,深井浪翠園L3樓雙號車位賣咗107.1萬元,約三年升值1.2倍。

浪翠園住宅單位仍未追到九七年,屬全港罕有,估唔到車位反而率先升破九七價,代理朋友記得,屋苑車位未賣過100萬元,今次成交創咗新高,依家車位月租近3,000元,由於車位數目有限,無論買賣、放租都好有需求。

劉Sir