主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 10027
地產新聞
樓市出更:提速批樓花 最短3個月
(太陽) 2015年7月27日
政府早年話會加快審批預售樓花文件,令更多單位供應市場,近年開始睇到成效。劉Sir發現年初至今批准預售嘅14個新盤之中,有9個或佔64%由申請到獲批預售少過一年時間,涉及3,301個單位。當中,恒地(00012)等馬鞍山迎海第4期迎海.駿岸申請咗三個月就獲批;而到目前為止,待批嘅22個項目,亦只佔約30%係申請咗超過一年。

發展局局長陳茂波兩年前曾經話過,地政總署會加派人手及加快程序,以加速審批預售樓花文件,事實上已經見到成效。由年初至今批咗預售嘅14個新盤,有9個由申請到獲批預售所用時間少過一年,涉及3,301伙。

駿岸峻瀅II數月即批

而當中,迎海.駿岸申請約三個月就獲批預售,百利保(00617)元朗尚築及長實地產(01113)將軍澳峻瀅II都係申請預售約四個月就獲批預售。

22項目待批涉萬伙

劉Sir知道,呢14個獲批預售新盤項目,只係有5個由入紙申請至獲批預售用咗超過一年時間,除咗新地(00016)嘅何文田天鑄及東涌東環2期,仲包括信置(00083)將軍澳帝景灣、會德豐地產油塘PENINSULA EAST及信置大嶼山梅窩銀河灣畔,共涉2,030伙。

睇番資料,截至六月底有25個新盤待批預售樓花,扣除迎海.駿岸及房協喜薈及喜漾啱啱係今個月獲批預售,目前仲有22個新盤待批預售,涉及10,277伙。

該批項目中,只有7個新盤入紙申請預售逾一年,包括長實地產馬頭角君柏、中國海外(00688)九龍塘海棠路62號及鴨脷洲南區.左岸、房協啟德煥然壹居及新地元朗峻巒發展項目3個期數,共涉1,863伙單位。

另外,22個待批預售新盤項目當中,有12個喺今年頭五個月才申請預售樓花,佔54.5%,涉及7,566伙。而呢22個待批預售項目,元朗區佔9個,涉及4,887個單位,樓盤及單位數目都冠絕全港。

劉Sir