主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6007
地產新聞
樓市出更:海防道舖 劈租23%留客
(太陽) 2015年7月14日
本港高檔消費品銷貨額下跌,早前已有珠寶鐘錶零售商話唔會擴充,部分地區舖位亦會關閉。劉Sir知道,旺區有間個人護理店成功喺尖沙咀「珠寶店集中地」嘅海防道續租,呢間商戶喺一二年原本喺同一條街租開一間較大面積嘅舖,但被加租九成,於是「大舖搬細舖」,租咗依家續租嗰間,今次係以60萬元成功續租,比舊租更低約23%。另近排中環皇后大道中更加有珠寶店被國際時裝店踢走。

有代理同劉Sir報料話,海防道單號地下6A號舖,面積約300方呎,獲城中知名個人護理店以60萬元續租,呎租約2,000元,較舊租金78萬元仲低咗約23%。

旺角舖短約漲租22%

劉Sir知道,嗰間個人護理店曾經喺一二年租用同一街道一個雙號舖位,不過,當時正值珠寶鐘錶業的黃金時期,嗰陣個舖位被業主加租九成至100萬元,於是惟有喺同一條街,租用面積細一半嘅舖位,亦即係今次續租嘅舖位。而喺近月,海防道亦只有一間內地金舖老鳳祥成功以高租金進駐。

而近排中環皇后大道中雙號地下,面積約1,600方呎,獲國際時裝店以85萬元承租,較舊租低21%,呎租531元,原租客為本地珠寶店。

另劉Sir八到,旺角花園街單號地下連閣樓,面積共約1,900方呎,以13.8萬元租出,較舊租金升15%,同區砵蘭街雙號入口連閣樓全層,面積約3,744方呎,獲短租租戶以16.8萬元承租,較舊有長租約高約22%。

荃灣三舖放售值逾億

成交方面,同區通菜街單號地下D號舖,面積約1,000方呎,以約2,690萬元售出,較原先叫價下調23%。

據了解,上址原業主為陳姓投資者,於一○年以1,950萬元購入該舖位,期間升值38%。

另外,通菜街單號地舖,面積約940方呎,獲買家以6,200萬元洽購。

第一太平戴維斯袁志光同劉Sir講,荃灣有3個舖位放售,包括大河道91至97號天保大廈地下F舖、鱟地坊80至84號華成樓B座地下B1及B2舖,以及華成樓B座地下B5舖,建築面積約150至1,550方呎,市值分別達6,000萬、4,400萬及800萬元。

劉Sir