呢排股市大幅波動，但就無影響到發展商推盤步伐同信心，上個月就有3個大盤齊齊入紙申請預售樓花，涉及3,137伙，創咗五十個月或超過四年單月新高紀錄。當中包括會德豐地產嘅將軍澳項目，同嘉華國際（00173）等元朗朗屏站項目等。
劉Sir尋日收到地政總署最新資料，上個月有3個大盤一齊入紙申請預售樓花同意書，包括嘉里建設（00683）何文田常樂街及常盛街交界百億地王項目，呢個盤提供1,425伙、嘉華國際等朗屏站項目就提供912伙。
迎海四期今季出擊
而會德豐地產嘅將軍澳至善街3號項目，上月亦都入紙申請預售，提供800伙，呢個盤料出年先推。截至上月底，共有25個住宅項目等緊批出預售樓花，共涉11,376伙，創二○一三年六月後新高。
地政總署資料又顯示，恒地（00012）等馬鞍山迎海第四期命名為迎海．駿岸，料最快今季開售。據一手銷售資訊網，同系長沙灣曉盈尋日上載10伙價單，售價504萬至1,487萬元，呎價16,848至20,010元，周六起發售。是次八十天付款計劃可獲售價減3%，較之前減5%為少，而印花稅回贈優惠為成交價2%，較三月時發出的1C價單回贈6%為少。
曉盈新推33樓A室呎價18,070元，相比年初發出的2A號價單內32樓A室呎價16,217元高11.4%，相對之前每層售價差幅約1%，估計是次售價有所調升。
維港．星岸上載樓書
長實地產投資董事郭子威直言，無懼股市波動，紅磡維港．星岸會勇往直前，樓書尋日上載到樓盤網站，有機會本月開售，首批推出唔少於65個分層單位，洋房暫未計劃推出。
該盤示範單位最快下星期開放，睇番樓書，該盤分層戶實用面積由706至1,408方呎，其中1座A室樓王四房大宅，主人套房浴室特設罕有弧形落地玻璃。
另外，信置（00083）大嶼山BOTANICA BAY尋日賣出18號獨立屋，售價約莫1億元，呎價約2.4萬元，買家享15%買家印花稅現金回贈，折實售價超過8,550萬元，呎價約20,408元。買家為本地上市公司主席的關聯人士。
劉Sir
App下載
