主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5531
地產新聞
樓市出更:富榮實呎萬四雙破頂
(太陽) 2015年7月7日
市場住屋需求強勁,用家主導嘅居屋市場做價繼續破頂。好似旺角居屋富榮花園又有新紀錄,屋苑一個兩房自由市場成交價610萬元,除咗係兩房新高價外,實用呎價14,153元仲創埋屋苑新高。莫講話居屋,依家公屋無兩球都唔使諗入市。有代理報告提到,今年上半年嘅公屋登記成交,平均每宗去到222.2萬元,首次突破兩球,係超過十四年以來有紀錄最高。

劉Sir睇番土地註冊處嘅資料,上述富榮花園18座高層K室,建築/實用面積505/431方呎,上個月以610萬元成交,計番實用呎價約莫14,153元。

兩房戶賣610萬新高

老友家天下黎振傑就話,呢個單位係兩房間隔,仲有少少海景,喺今年初試過以550萬元叫價放售,不過個業主放盤態度都幾強硬,而今次售價610萬元係富榮花園兩房新高價,至於實用呎價14,153元,更加係屋苑史上最高。

依家樓價高企不下,就算係公屋價格都愈搶愈高,中原黃良昇同劉Sir講,今年上半年加埋有約277宗公屋登記成交,總值大約6.15億元,雖然比起舊年下半年少咗約16.3%同埋6.7%,但係平均每宗公屋售價就有顯著升幅。

黃良昇仲話,上半年平均每宗二手公屋成交價大約222.2萬元,按半年計就上升咗約11.5%,係二○○○年下半年有紀錄以來逾十四年新高,平均每宗售價首次突破兩球。

其中,上月錄得成交嘅將軍澳寶林邨寶泰樓高層單位,售價約430萬元,創咗全港公屋新高價。

夾屋芊紅居643萬沽

劉sir知道,最近夾屋成交都幾活躍,老友美聯曾偉明話,葵涌夾屋芊紅居2座高層F室,建築/實用面積801/595方呎,放盤一周就畀買家以約643萬元承接,實用呎價10,807元。中原黃惠霞都話,同區浩景臺1座中層H室都以460萬元賣出咗,實用呎價大約9,563元。

祥益胡志偉就話,屯門夾屋景新臺4座高層B室,實用面積497方呎,自由市場成交價388萬元,實用呎價7,807元。

劉Sir