主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 5771
地產新聞
樓市出更:兩項目招手 大拿拿80億
(太陽) 2015年7月6日
政府踏入新一季火速啟動賣地計劃,並會由「一鐵一局」項目打頭陣,頭兩個項目都由佢哋撐起,相信係近年罕見,合共提供接近2,000伙住宅,估值共約80億元。劉Sir知道,西鐵元朗站項目聽日截收發展意向書,涉及約莫1,876伙,係今季最矚目嘅住宅項目,市場估值最高超過74億元;至於市區重建局嘅筲箕灣西灣河街重建項目,就會緊接喺後日截收意向,估值最高約6.24億元。

劉Sir知道,「一鐵一局」各有項目喺今個禮拜截收發展意向書,而焦點就會落喺聽日截標嘅「重量級」元朗站項目,呢個項目由籌劃至今大大話話超過十年,雖然仲有司法覆核訴訟隱憂,但係都無阻政府推地嘅決心。

呢個項目將提供約莫136.1萬方呎住宅樓面,計劃興建6幢樓宇,提供唔少過1,876伙住宅單位,另亦有大約12.4萬方呎嘅非住宅樓面,而商場部分就佔大約10.7萬方呎。

劉Sir老友第一太平戴維斯陳超國就話,政府加快推出元朗站,都反映咗佢哋增加私宅供應嘅決心。
訴訟隱憂或影響出價

提到項目有訴訟隱憂,佢就覺得對發展出價或多或少會有影響,估計每方呎樓面地價大約3,000元。

計番估值約莫44.56億元,而項目現時嘅估值上限大約74.27億元,即係每方呎樓面地價約5,000元。

西灣河街細碼料搶手

至於後日截意向嘅市建局筲箕灣西灣河街項目,就只係屬於「蚊型」規模,呢個地盤佔地大約7,643方呎,住宅樓面約莫57,696方呎,將會提供大約120個單位,另會設有約莫6,459方呎嘅商業樓面。

理想城市張聖典話,呢個筲箕灣重建項目位處舊區又唔近海,所以周邊環境會比較輸蝕,但係項目嘅規模細,各類財團都有條件競投,相信反應會相當踴躍。

張氏估計項目每方呎樓面地價約莫9,000元,計番估值就大約5.77億元。而依家市場嘅最高估值大約6.24億元左右。

劉Sir