內地個人遊消費力大幅減弱，尤其核心購物區商業物業最受影響，唔少城中知名投資者都同劉Sir講，佢哋已經轉戰二線街舖位同車位，計下數，佢哋上半年喺非核心區入市個案至少有14宗，成交額共逾9.8億元。其中，以紀惠集團副主席廖偉麟最勇，半年斥資共約4.57億元購入北角御皇臺一籃子舖位及車位與牛池灣嘉峰臺商場。有投資者仲話，睇好二、三線區細價舖，估計下半年租售價均會上升3至5%。
劉Sir睇番市場資料，近期舖位市場較活躍嘅投資者，包括有廖偉麟、林子峰、「物流張」張順宜、蔡伯能，同埋陳秉志、羅珠雄和蔡志忠三人組合等，依班投資者上半年入市個案至少涉14宗，成交金額逾9.8億元億元，入市舖位分布喺北角、香港仔、牛池灣、太子、新蒲崗、葵涌等非核心地區，另亦有柴灣、馬鞍山及大埔區等一籃子住宅車位等。
廖偉麟同劉Sir講，早前購入嘅一籃子英皇道物業，會等交易完成後先考慮拆售，暫時會作收租用途。
廖偉麟想低撈優質舖
對於近排有銅鑼灣等核心區舖租大跌兩至三成，廖偉麟表示，早前已預計呢個情況，故會考慮趁低吸納核心區舖位，但暫時未係入市時機，相信仍有下跌空間，預計下半年核心區舖位租金有15%下調空間，售價料跌5至8%。
佢話繼續睇好非核心區民生地段舖市，更話個別民生地區嘅銀行同證券行人流非常暢旺，相信與早前港股成交增加有關，料民生舖租有10至15%升幅。
二三線租售價睇升5%
資深投資者黎永滔亦預計，核心區舖市短期內唔會有好消息，認為舖市租售價已跌夠，下半年將平穩發展，近日主要留意核心區舖，會揀選優質舖位趁低吸納，而佢早前已將旗下旺角亞皆老街舖位租比內地金舖老鳳祥，佢認為內地零售商已減少在內地擴充，反而選擇進駐本港。
另蔡志忠稱，睇好二、三線「細價舖」，認為「仲平過住宅」，加上近排有基金標售非核心區物業時獲理想出價，料下半年該區舖位租售價均升3至5%。
劉Sir
App下載
