近排有唔少新盤入伙，令到市場租盤多咗，所以早排租金都稍回落番，不過市場最近似乎已經適應咗。有代理話，本港100個大型屋苑嘅平均實用呎租，連跌兩個月後穩定番落嚟，五月份報約32.7元，按月維持不變，相信暑假租務旺季會重拾升軌，平均實用呎價隨時升穿33元嘅歷史高位。
中原黃良昇同劉Sir講，根據佢哋新簽租約統計，上個月全港100大型私人屋苑平均實用呎租約莫32.7元，同四月份一樣無升跌。
雖然之前連跌咗兩個月，但加埋跌咗唔夠1%，所以依家呎租都算係高位橫行，亦反映咗最近多個大型新盤入伙，帶動租盤增加帶來嘅租金調整期已經結束咗。
佢估計，嚟緊嘅暑假租務旺季，學生同家長嘅租屋需求都會增加，相信會刺激租務市場，估計租金會重拾升軌，整體平均實用呎租有機會升穿33元歷史高位。
康怡上月升近3%標青
至於十大藍籌屋苑，黃良昇就話，其中有5個喺上月嘅租都錄到升幅，以鰂魚涌康怡花園嘅實用呎租升幅最顯著，按月升咗約2.9%去到38.6元。
其次荔枝角美孚新邨都升咗約1.9%至31.4元，至於沙田第一城、鴨脷洲海怡半島同藍田滙景花園，租金按月升幅約莫0.9至1.4%。
睇番今年頭5個月嘅租金走勢，劉Sir老友美聯劉嘉輝就話，期間嘅私宅平均實用呎租累升咗約2.4%，以佢哋公司嘅租務個案分析，頭5個月月租1.5萬元或以下嘅租務成交，佔整體比例約39%，至於1.5萬元以上至2萬元則佔約22.4%，淨番約38.5%就係月租逾2萬元嘅租務個案。
麗港城實呎36.4元新高
劉Sir知道，最近市場開始出現租金創新高嘅租務個案，市場消息話，藍田麗港城19座低層B室，實用面積517方呎，啱啱以月租約莫1.88萬元租出咗，計番實用呎租就大約36.4元，創咗屋苑分層標準戶歷史新高。
另外，香港置業曾家輝就話，長沙灣昇悅居3座高層E室，實用面積459方呎細兩房單位，剛剛以月租約1.75萬元租出，實用呎租約38.1元屬高價。
劉Sir
App下載
