主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8920
地產新聞
樓市出更:恒地買屯門地刷新紀錄
(太陽) 2015年6月18日
供應重災區屯門有新地王誕生,恒地(00012)奪得今年集團首幅土地,尋日以逾36億元奪得屯門管翠路住宅地,每方呎樓面地價約莫4,621元,雖然係市場預期範圍,但足以成為政府賣地有紀錄以來,地價最高嘅屯門單一地皮,恒地話呢幅土地嘅總投資額高達80億元。

地政總署公布,中央投標委員會授權該署將呢幅屯門第56區管翠路地皮批予出價最高投標者,成交價36.289億元,中標財團係恒地。

劉Sir知道,地皮上個禮拜收到9份標書,投標財團全數係「本地薑」,包括附近有項目的新地(00016)及會德豐地產,最後由恒地成功投得呢幅屯門地,係佢哋今年首幅投到嘅地皮。

李家誠:價合理擬獨資

對上一幅係舊年九月奪得嘅尖沙咀中間道商業地,成交價46.88億元,再對上一幅係前年以28.88億元投到嘅上水青山公路地皮。

恒地副主席李家誠話,地皮優質有海景,又鄰近知名國際學校,覺得成交價合理,集團獨資發展,計劃打造成優質住宅區,預計總投資額約莫80億元。

邊境購物城地皮成交

劉Sir老友高緯環球張翹楚話,項目可以作分層同洋房混合發展,預計分層住宅將來落成實用呎價要1.3萬至1.5萬元,而洋房就最少要2萬元。

其實屯門地皮規模普遍唔係咁大,今次管翠路地王誕生之前,只有九七年批出嘅屯門第16區住宅地,同一二年批出嘅屯門前掃管笏軍營北地盤嘅地價較高,成交價29億同埋27.39億元。

劉Sir知道,恒地最近同新地都合作搞個邊境購物城,睇番土地註冊處資料,新田村路與惇裕路交界一幅地皮(港鐵落馬洲站以南),舊年九月以逾8.55億元成交,買家係旋高發展有限公司,公司董事包括恒地副主席林高演同埋新地副董事總經理雷霆等。

恒地發言人同劉Sir講,呢幅地皮係未來購物城嘅一部分。

而恒地主席李兆基早前講到,將元朗新田一幅42萬方呎、由恒地同新地各佔五成權益嘅土地,象徵式以一元出租畀新成立嘅非牟利基金,作邊境購物城。

劉Sir