屬水貨客天堂嘅上水，零售商對倉存需求強勁，尋日一個私人拍賣會，咁啱有單一業主將上水新勤街及永生街三幅無契舊屋地推出拍賣，該3幅舊屋地可作倉儲用途。該3幅舊屋地最終以6,030萬元全數拍出，其中一幅更搶高幅度達89%，個別更獲高達60口出價，其中新勤街舊屋地成交價3,560萬元最高，聽講新買家係區內零售商，計劃用嚟擺貨。
忠誠拍賣尋日拍出其中1項新勤街單號舊屋地，地段面積約1,585方呎，開價2,300萬元，獲4組買家承價超過60口，最終以約3,560萬元拍出，搶高約55%，呎價達22,461元，劉Sir仲八到，買家係本地零售商，諗住買入物業做貨倉，而家該屋地收緊2萬元租金。
另外同區永生街嘅舊屋地，地段面積約891方呎，開價760萬元，亦獲3組買家承價，以1,440萬元拍出，更搶高89%，呎價約16,162元。
而同一街道另一舊屋地，面積約980方呎，開價830萬元，同樣獲3組買家承價，以1,030萬元拍出，搶高24%，呎價約10,510元，聽聞以上兩屋地分別由同一街道嘅舖位業主買入。
鑽石山工廈28伙拆售
忠誠老友話，以上三項物業都係戰前興建，樓契正本已經唔見咗，可以作為倉儲用途，料屋地可重建為2層高嘅物業。
市區倉存空間亦受追捧，中原劉重興話，有投資者拆售鑽石山嘉就工業大廈2A及5至6樓，項目命名為「東滙CBD2」，涉及69個工作室及儲物室，面積約46至411方呎，首批會推出28伙，售價32.8萬至299.8萬元，買家可享首兩年5%租金回報，料呎租可達24至32元。
百利保奪市建局酒店
另市建局公布，首個推出嘅酒店項目，大角咀晏架街/福全街項目由百利保（00617）及富豪酒店（00078）組成嘅財團奪得，項目地盤面積約7,815方呎，將興建為一幢23層高的酒店。
據土地註冊處資料，銅鑼灣羅素街8號銀座式商廈6樓以1.1億元沽出，買家公司董事為邱志堅。該單位一二年以1.2億元購入，是次成交價低約1,000萬元。
劉Sir
App下載
