主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8949
地產新聞
樓市出更:大埔海鑽首現銀主盤
(太陽) 2015年6月16日
雖然近期一、二手市況都唔錯,但銀主盤就仍然未見減少。劉Sir數數手指,市場今個月到依家約莫新增咗8個銀主住宅單位,部分屋苑更加係首度失守添。好似大埔白石角海鑽.天賦海灣,有個3座銀主盤喺今個月尾攞出嚟拍賣,開價3,800萬元,比兩年前買入價低咗超過15%,而九龍站君臨天下就再度出現銀主盤,今次呢個單位係1座高層戶,叫價約4,480萬元。

兩年前開賣嘅一手豪宅新盤大埔白石角海鑽.天賦海灣,最近就出現首個銀主盤。

環亞拍賣下個星期推出海鑽.天賦海灣第3座低層A室銀主盤拍賣,個單位實用面積約2,184方呎,開價3,800萬元,實用呎價約17,399元。

名鑄比墅同場推出

據土地註冊處資料,個單位係原業主喺一三年以4,489.67萬元一手買入,即係今次開價比購入價低超過15%。

另外,該行同日都會推出荔枝角美孚新邨萬事達廣場3號中層B室銀主盤,單位實用面積約659方呎,不過,呢個銀主盤暫時仲未開價。

環亞同場都有幾個豪宅盤攞出嚟拍賣,其中尖沙咀名鑄中層J室,實用面積約1,123方呎,開價2,800萬元,呎價約24,933元。

而大埔比華利山別墅萊茵道單號屋,實用面積約1,606方呎,連花園及天台,開價1,680萬元,呎價約10,461元,較市價低約15%。

至於曾經係銀主盤重災區嘅九龍站,最近再有新銀主盤推出,個單位係君臨天下1座高層B室,實用面積約1,061方呎,連車位,叫價4,480萬元,折合後平均實用呎價約42,224元。市傳該單位嘅原業主係內地人。

葵涌iPlace平17%誘客

另一方面,除咗銀主盤會選擇用拍賣方式出售之外,葵涌工廈樓花iPlace都首度有單位用呢個方式推出。

忠誠拍賣今個月會推出iPlace一個高層3室,面積約436方呎,開價288萬元,呎價約6,605元。

據聞,呢個單位喺今年四月份開賣嘅時候,當時價單售價近350萬元,而今次開價就比當時發展商定價低咗約莫17%,相信業主係想吸引多啲買家競投。

劉Sir