主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8462
地產新聞
樓市出更:長洲項目估值天與地
(太陽) 2015年6月15日
今個禮拜五將會有一幅離島長洲花屏路住宅地截標,係政府超過八年以嚟首幅同區供應,加上長洲嘅住宅買賣一向稀疏,喺缺乏參考下令市場嘅估值都出現頗大分歧,估值由介乎5,873萬元到1.8億元不等,每方呎樓面地價約莫2,000至6,130元,差幅足足超過兩倍咁多。

劉Sir知道,呢幅長洲花屏路住宅地,佔地約莫3.67萬方呎,地積比率0.8倍,總樓面大約2.94萬方呎,而建築物嘅層數唔可以高過3層,而中標財團須於二○二○年三月底前完成項目。

其實政府近年推咗唔少離島地皮,之不過單計長洲,就已經有足足超過八年無同區供應,數到對上一幅批出嘅長洲住宅地,係長洲水坑地皮,喺○七年三月由卓能集團(00131)以9,650萬元投得,計番每方呎樓面地價約莫2,159元。

而再對上一幅批出嘅長洲住宅地,就更加要追溯到上一個世紀,長洲西灣地皮喺一九九九年以450萬元成交。

地皮料最多值億八

由於長洲地價都無乜數據可以參考,所以市場對呢幅花屏路地皮嘅估值都有幾大分歧,其中估價比較進取嘅理想城市張聖典就同劉Sir講,呢幅地皮位於長洲南部,大部分單位前臨海景,預計可以作別墅式嘅豪宅發展,相信可以吸引唔少發展商參與競投。張聖典最進取,估計地皮值約1.8億元。劉Sir計番每方呎樓面地價大約6,130元,係目前市場嘅上限價。

享海景 無車路直達

不過,亦有測量師老友唔睇好呢幅離島地嘅地價,中原測量師行張競達就話,呢幅花屏路地皮嘅地勢較高,料可享有海景,而附近亦有少量低密度式屋苑,好似花屏山莊同埋海景花園等,但係地皮嘅位置始終比較偏僻,無車路直達,距離長洲碼頭亦有約莫二十分鐘步程。
張競達估計地皮每方呎樓面地價大約2,000元。計番估值約5,873萬元,係市場下限估值,相比地皮嘅上限估值大約1.8億元,差幅足足超過兩倍。

即將截標住宅地基本資料

地皮:長洲花屏路住宅地
佔地:約36,706方呎
總樓面:約29,365方呎
市場估值:約5,873萬至1.8億元
每方呎樓面地價:約2,000至6,130元
截標日期:本周五

劉Sir