主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8608
地產新聞
樓市出更:北區指標盤全過萬蚊呎
(太陽) 2015年6月12日
本港樓價係咁升,新界北區樓價升勢更驚人,依家區內主要屋苑已經無實用呎價低過1萬元嘅單位。一份代理行樓價指數睇到,北區7個成分屋苑當中,舊年年尾有6個實用呎價都唔過萬,但今年五月已經全部實用呎價過萬元關口。不過,北區樓價升幅竟然跑輸一河之隔嘅深圳樓,有代理行數據又話,深圳今年首五個月樓價漲幅達7.6%,而新界西北區同期樓價漲幅只得6.3%。

劉Sir睇到中原城市領先指數(CCL)資料,截至舊年十二月底,北區7個成分屋苑當中,有6個屋苑實用呎價低過1萬元,當時僅上水中心實用呎價10,080元;但去到今年五月份,呢7個屋苑全部實用呎價都超過1萬元。

沙田富豪花園仍墮後

而馬鞍山區成分屋苑都好勁,7個屋苑實用呎價全部過哂萬元關口,而舊年年尾仲有翠擁華庭實用呎價9,144元。

中原地產黃良昇對劉Sir講,大埔區方面,舊年年尾至今,3個成分屋苑只有新峰花園實用呎價仲未升穿1萬元,最新實用呎價報9,411元;沙田區方面,8個成分屋苑仲有富豪花園實用呎價低於1萬元,另銀禧花園實用呎價則由舊年9,705元,狂升至依家嘅11,856元。

綠悠軒花都齊創指標

佢仲話,新界東而家只係剩番兩個屋苑實用呎價未破1萬元,佔25個成分屋苑嘅8%,而舊年就有10個成分屋苑未過萬,佔比例40%。

粉嶺綠悠軒啱啱出現首宗呎價破萬元成交,美聯周志強話,屋苑一個7座高層B室,實用面積約479方呎,以約480萬元成交,實用呎價約10,021元,屬屋苑歷史新高。另外,市場有消息話,同區花都廣場一個連天台戶以560萬元賣出,實用呎價逾1.06萬元,料樓價破頂。

深圳樓五月累升7.6%

原來深圳樓升得仲勁。美聯物業謝梓旻話,該行發現深圳樓升值潛力可能勁過香港。

佢仲話,本港樓市今年首五個月樓價升5.8%,當中新界西北區升幅約6.3%;與此同時,深圳樓價表現仲勁,同期漲幅達7.6%;如果以今年四月同五月份計算,深圳的二手樓價升幅達到5.7%,而同期新界西北區的樓價升幅只有1.4%。

劉Sir