主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8535
地產新聞
康城七期預十財團爭
(太陽) 2015年6月1日
「一鐵一局」喺明日一齊有項目截標,其中焦點係港鐵(00066)將軍澳日出康城第七期住宅及商場項目,繼大圍站後今次再就商場部分提供A、B餐,畀財團選擇投唔投埋商場部分。劉Sir知道,商場部分每方呎補價要約莫5,110元,住宅就只係約1,904元,有測量師老友就覺得部分發展商可能嫌貴,只投住宅部分,預計項目可以收到10份標書左右。而同日截標嘅市建局大角咀晏架街酒店項目,估值最高5億元。

呢個日出康城第七期係成個發展項目首個附設商場嘅期數,之前就收到28家財團遞交意向書,係鐵路上蓋項目歷來最多嘅一次。其中喺日出康城有發展項目嘅長和(00001)、新地(00016)、會德豐地產同南豐都有份交意向。

商場扯貴 補價冠康城

劉Sir打探到,項目嘅補地價金額約莫38.8779億元,以住宅同埋商場嘅總樓面約123萬多方呎計,每方呎補價大約3,147元,係日出康城最貴嘅一期,主要係畀商場部分扯高咗,商場每方呎補價約莫5,110元。至於發展商有兩種方案可以選擇,包括一併競投住宅同商場,或者只競投住宅部分,而呢兩種方案嘅分紅細節上會各有唔同。

第一太平戴維斯陳超國話,項目嘅商場部分係日出康城嘅「獨市生意」,加上鐵路上蓋發展向來受歡迎,相信發展商都會踴躍入標,佢估計會收到約莫10份標書,而由於商場部分嘅地價比較高,部分發展商或者會選擇只競投住宅部分。

大角咀酒店估值5億

至於同日截標嘅市建局大角咀晏架/福全街酒店項目,就有20家財團獲邀入標競投,劉Sir知道,呢個項目嘅招標條款其實相當簡單,將來中標財團無論選擇自己營運收租、抑或轉售出去,市建局都唔會要求任何分紅,咁即係會由發展商出價多少分勝負。

陳超國話,就算內地旅客訪港情況放緩,市區酒店項目長遠嚟講始終有潛力,相信截標反應唔會太冷淡。劉Sir知道,項目將會發展一幢樓高23層嘅酒店,總樓面大約7萬幾方呎,提供約莫200間客房,市場估值最高約5億元,計番平均每間客房約莫250萬元。