主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 9207
地產新聞
樓市出更:樓價癲升租金如慢牛
(太陽) 2015年5月20日
金管局二月份出招收緊細價樓按揭,令部分業主轉售為租,加上呢排陸續有新盤入伙,租盤增加,搞到今年頭四個月平均實用呎租只升1.3%。不過,美聯布少明同劉Sir講,由於就快到傳統租賃旺季,相信租金會受帶動,全年估計升約8%,但升幅依然唔及樓價。

布少明話,根據佢哋嘅資料,上月私樓平均實用呎租約33.17元,首四個月只係升約1.3%,同期平均實用呎價就升近5%,去到10,475元,令到租金回報率已經連續五個月喺唔夠4厘嘅低位橫行,四月份只得約3.8厘。

傳統屋苑中,沙田第一城、天水圍嘉湖山莊、屯門市廣場、青衣盈翠半島同東涌映灣園,細單位平均呎租都比大單位高,好似沙田第一城一個實用面積400方呎或以下嘅細單位,平均呎租去到36.1元,但400方呎以上之單位呎租只得32.2元,相差3.9元。

愈細愈貴亦都出現喺新入伙盤,好似荃灣環宇海灣、馬鞍山迎海.星灣、元朗溱柏都有呢個現象,溱柏一個實用面積400方呎或以下嘅開放式戶,平均呎租高約29.2元,而400至600方呎嘅單位平均呎租約22.3元,相差6.9元,而600方呎以上之單位平均呎租更只得20.5元。

沙田區累漲2.6%算勁

若果以區域分析,空置比較低嘅葵青同沙田區,今年頭四個月平均實用呎租累升約2.5%同約2.6%,同樣跑贏大市。

近期開始有大學生出動搵租盤,最近有3個內地學生就夾份以月租約1.1萬元租咗沙田第一城50座中層C室,以實用面積約305方呎計,實用呎租約36.1元,相信遲下實用呎租有機會去到40元。

市區萬蚊樓下盤快無

至於上水、粉嶺區今個月平均呎租升到去約28元,最近有部分雙非父母會有興趣喺呢兩區租樓,帶動睇樓量升咗約兩成,現時每日有約20組客到嚟查詢或者參觀租盤。另美聯劉卓豪話,將軍澳君傲灣2座中層A室以月租約1.8萬元租出,創屋苑兩房租金新高,實用呎租約36.1元。

中原黃良昇話,最近有唔少新界新盤入伙,令到第二季新界區月租5,001至10,000元嘅租務成交比例去到10.1%,按季升咗1.7個百分點,結束連續三季處於一成以下水平,而呢類細價租盤今年有望喺港島同九龍區消失。

劉Sir