主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8847
地產新聞
公僕舊樓建居屋 坐言起行最重要
(東方) 2015年5月20日
房屋問題愈來愈嚴重,港府束手無策,一味呻「地從何來」。其實,遠在天邊,近在眼前,二百幾幢上世紀五十年代興建嘅公務員舊樓,大部分位於市區黃金地段,當局唔識好好利用,淨係識得卸責,又點可能解決房屋問題吖。

本報兩年前率先報道,公務員合作社舊樓因無法解決分契及補地價等問題,就算日久失修亦難以重建,令大批年邁業主苦不堪言。發展局前年答應尋找解決方案,並承諾舊年向立法會匯報結果,點知一直無聲無息。直到最近,發展局至建議由房協推出先導計劃,以「不虧蝕」嘅原則收購有關樓宇,然後重建成居屋。具體做法係由房協負責向政府補地價,並以市價甚至高於市價約一成收購,前提係需齊集全數業主參與,目標係位於深水埗、九龍城及港島東區有重建潛力嘅公務員舊樓,預料明年初推出計劃細節。

當局係咁講嘅,現時有一百七十八個已解散而未重建嘅公務員合作社地盤,估計當中八十五個有重建潛質,即重建比率可達兩倍或以上,預計可額外獲得二十三萬多平方米樓面面積,如以重建後每單位約五十平方米計算,可增加四千個單位喎。

係人都知,呢批已有五十幾年樓齡嘅公務員舊樓,多數甩皮甩骨,而且冇電梯,可以講係危機四伏。重建之後,除咗可以增加房屋供應,而且可以消除安全隱患,改善市區環境,提高居住質素,一舉數得,何樂而不為呢?遲到好過冇到,當局拖咗咁耐至計劃將公務員舊樓重建為居屋,遲就遲咗啲,但總好過乜都唔做,繼續浪費土地資源。

所以話,一切事在人為啫,只要當局肯做嘢,增加房屋供應唔係冇辦法。呢,除咗重建公務員舊樓之外,發展商表示願意捐出大坑西邨地皮,重建成五千個青年居所,一樣有得諗。總而言之,講多無謂,食多會滯,行動最實際,無論係咩重建計劃,最緊要坐言起行,唔可以議而不決,否則,隨時又係得個講字嘅咋。

今時今日,私人樓價高處未算高,公屋輪候冊大排長龍,房屋問題已成為計時炸彈,當局再唔盡快諗辦法拆解,遲早爆大鑊。呢嗱,有對拍咗八年拖嘅情侶,本來計劃明年拉埋天窗,點知男朋友獲分配公屋後即時變得囂張,一時威脅唔結婚,一時又話公屋唔加名,女朋友忍無可忍,卒之掟煲收場。呢個故事話畀大家知,好多年輕人望樓興嘆,房屋問題唔止係民生問題,亦係政治問題,甚至係婚姻問題,絕對唔講得笑o架!