主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8543
地產新聞
80後CEO 逆主流遲買樓
(太陽) 2015年5月13日
依家連中學生都話想買樓,80後90後就更加唔使講,又有人話香港樓市會升多10%;竟然有位80後唱反調,佢就係強泰環保80後CEO兼執董Penny陳昆。

香港樓市仲會升多10%?Penny覺得呢個疑問。咁佢自己有無樓喺手先?佢手上啲香港資產,近年已經放晒,只係仲揸住啲內地樓。睇樓市睇得咁淡?唔係唔係,佢話唔係睇淡香港樓市,仲話明一定會喺香港買樓,因為自己始終喺香港出世,但總之就唔係依家買喎。

寧願做其他投資

佢仲好認真咁講,與其依家買港樓,不如攞舊錢嚟做其他投資,閒閒哋20%至30%回報好容易。咁,即係乜嘢其他投資?噢,最重要嗰一句,Penny就係無答。

咁依家唔買,應該幾時買?Penny話個人認為樓市走勢有高有低,既然香港樓價都高咗咁多年,相信有機會回落。咁佢若然遲啲買,港樓首選地點係?佢話整體以港島地區為主。Well……

睇到呢度,係咪覺得Penny唔多似本地嘅80後呢?冇錯。佢雖然香港出世,但佢家族其實係印尼華僑,喺印尼有唔少業務兼投資,包括地產、酒、重工業等。佢家族亦係強泰嘅大股東,所以Penny美國畢業後,○七年就加入咗強泰,年中仲睇唔少東南亞同中港地區投資項目。所以對於佢嚟講,投資賺20%至30%好容易囉。