主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7671
地產新聞
樓市出更:新貨趕推申樓花飆4倍
(太陽) 2015年5月8日
近排新盤賣得咁好,發展商梗係食住個勢部署推盤啦。劉Sir知道,單喺上個月就有4個項目入紙申請預售樓花,加埋有2,140伙,按月勁升四倍,好似新入嘅新地(00016)元朗東頭德業街項目,就有523個單位申請預售,並命名為「映御」,估計項目會喺下季推出。至於長實前元朗邨限呎項目同埋恒地(00012)等嘅烏溪沙迎海第四期都分別入咗紙申請預售。

發展商積極推盤,特別係新地同長實兩間大型發展商,劉Sir睇番地政總署嘅資料,喺上月有4個項目新申請預售樓花,涉及單位大約2,140伙,對比三月足足多咗四倍咁多,包括新地元朗東頭德業街映御,提供523個單位。

26項目逾九千伙待批

至於同於上月申請預售嘅仲有本港第一個限呎項目嘅長實前元朗邨重建,同埋恒地等嘅烏溪沙迎海第四期,分別提供約1,129及474個單位,預計兩個項目都會喺下半年推出。

雖然上個月有2,140個單位新申請預售樓花,但係依家合共26個待批項目,加埋約9,452個單位,只係比起三月多咗80個。整體待批項目無大幅增加,原因係上個月獲批預售嘅3個項目中,合共多達2,060伙,按月增加逾兩倍,創近七個月新高。

呢3個項目由新地同長實囊括,包括新地的東涌東環發展項目第二期、何文田佛光街23號天鑄,分別佔932及256伙最多,而長實將軍澳峻瀅II亦有872伙獲批預售。

鴨脷洲地倡改住宅

劉Sir老友美聯劉嘉輝話,上個月申請預售樓花單位數目大增,正正反映發展商加快部署賣樓,推盤意欲相當積極,預計唔少項目可望喺年內相繼獲批並推出市場,新盤市場勢將百花齊放。另外,劉Sir發現,嘉里建設(00683)嘅屯門掃管笏青山公路第48區將會押後一年落成,最新嘅預計落成日期係二○一七年十二月底。

政府繼續密密手搵地,根據區議會文件,規劃署建議將鴨脷洲利南道現時用作香港駕駛學院土地,轉為住宅(甲類)用地,最多可建樓面逾79萬方呎樓面,提供約1,500伙住宅單位。

劉Sir