主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8877
地產新聞
樓市出更:銀主貨湧到勢續增
(太陽) 2015年4月27日
股市大時代,二手樓市獨憔悴,交投冇咩起色。有業界人士話,市場上銀主盤數量已經升到60至70個,比兩個月前多咗超過15%,預計下半年銀主盤會繼續增加。事實上,由月初到依家,單月至少新增約15個銀主盤,當中以居屋同公屋最多。

環亞拍賣曾傑俊同劉Sir講,市場上銀主盤放盤量升到去60至70個,比約莫兩個月前嘅50至60個明顯多咗,不過,近排銀主盤亦比較好賣。

公司名義業主佔多

佢仲話,銀主盤主要嚟自公司名義業主,並非個人名義業主,相信係同個別公司壞帳增加有關,預計下半年銀主盤會繼續增加。

睇番資料,由月初到依家為止,市場已新增至少15個銀主盤,當中佔至少7個係居屋、公屋同夾屋銀主盤,包括罕見嘅黃竹坑居屋雅濤閣銀主盤,單位係1座低層D室三房,第二市場放售價438萬元,實用呎價約7,604元。

另外,將軍澳居屋富康花園4座高層K室,實用面積431方呎,第二市場放盤價350萬元。公屋有牛頭角公屋彩霞邨彩月樓高層1室,第二市場放售價約228萬元。同時亦有夾屋銀主盤何文田欣圖軒2座低層C室,叫價約580萬元。

居屋銀主盤幾受買家歡迎,日前首度推出拍賣嘅筲箕灣愛蝶灣8座低層J室銀主盤,成功以485萬元拍出,呎價約10,021元,搶高約27.6%。

羅便臣道4伙罕見

其實今個月亦都多咗豪宅銀主盤,好似港島區西半山羅便臣道1號依個月又增加咗1個銀主盤,係高層單位連車位,放售價約4,100萬元。呢個屋苑由舊年到依家,先後出現咗5個銀主盤,賣咗其中1伙,依家仲有4個,叫價最高9,000萬元。

劉Sir知道,呢個屋苑以用家主導,所以放盤量一向不多,依家出現4個銀主盤算係相當罕見,亦係西半山區內暫時最多銀主盤嘅住宅屋苑。

同區福澤花園一個B座低層3號室連平台及車位銀主盤,實用面積約721方呎,叫價約1,400萬元;另外,大埔比華利山別墅再有銀主盤,湖景道一個單號屋連車位,實用面積2,475方呎,叫價約2,180萬元。

劉Sir