主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7370
地產新聞
樓市出更:迷你戶搶手 租價鬥高
(太陽) 2015年4月22日
香港嘅住宅面積愈嚟愈細,有唔少都細過200方呎,但係呢類單位租金就愈嚟愈誇張;好似依家收緊樓嘅大埔嵐山,開放式單位已錄到7單租賃成交,實用呎租最高去到40元,相信係屋苑最高;另外,黃大仙公屋鳳德邨開放式單位,新業主收樓後即成功以月租7,000元租出,實用呎租47元,創屋苑新高。

中原韓敬樂同劉Sir傾開,話嵐山依家已經有11單租賃成交,佔7宗係開放式單位,月租約7,000元,由於月租金吸引,有唔少學生租客,有個I期5座高層H室,實用面積約180方呎,月租7,250元,實用呎租40.3元。

該屋苑收樓後租盤增加到140個,有開放式單位租盤,最高月租叫價去到成萬元,大單位平均實用呎租約23至30元。

就算公屋細單位都貴租,富誠地產陳錫金講,東九龍連單幢樓月租1萬元以下無晒租盤,就算租個套房都要5,000元,鳳德邨開放式單位租盤即成搶手貨,紫鳳樓中層6室,實用面積約149方呎,業主二月才以179萬元購入單位,收樓後即以7,000元租出,實用呎租約47元,租金回報率約4.7厘。

太古坊栢舍趁旺預租

發展商都知細單位好租,太古地產(01972)住宅業務董事杜偉業尋日就話,旗下鰂魚涌服務式住宅太古坊栢舍推出25個開放式至一房單位接受預租,建築面積477至735方呎,租期由一個月至兩年,參考月租3.6萬至6.3萬元,呎租約75元起。

同系同區新盤MOUNT PARKER RESIDENCES實用呎租約80元,已是港島東區紀錄。

環宇收樓 150租盤湧至

美聯陳國良又話,沙田溱岸8號3座低層E室,兩房以每月2.3萬元租出,實用呎租45.1元創屋新高。佢同事梁浩文話,屯門瓏門有個連平台單位,俾公司客月租3.2萬元租咗,實用呎租約31.5元。

荃灣環宇海灣都收緊樓,代理話,屋苑目前有成150個租盤,兩房單位月租叫價由1.5萬元起。

不過,有報告就話因為多咗新盤租盤供應,拖低整體租金;中原話,根據該行簽租統計,全港100個私人屋苑三月平均呎租約32.8元,按月跌約0.6%,係升咗近十二個月以來首次下跌。

劉Sir