香港真奇怪，呢頭一屋難求，連廁所劏房都爭崩頭，嗰頭有屋冇人住，長期丟空養蚊，講起都冇人信。
唔係講笑，為咗安置受市區重建影響嘅租戶，市建局嘅前身土地發展公司早年以興建或收購嘅方式，為住戶提供安置單位，租金從優，部分甚至低至市價兩成幾。呢啲安置樓宇全部位於市區，包括大角咀、深水埗、旺角同西環，雖然舊咗啲，但勝在又平又就腳，本來應該有爆棚之盛至係，點知空置率一直高企，冷冷清清，悽悽慘慘。
好似一幢位於大角咀嘅安置大廈咁吖，總共四十幾個單位，入夜後只有十幾個單位着燈，其餘單位烏燈黑火，成幢樓好似「鬧市鬼域」咁。有居民話，印象中有人搬入嚟住已經係三年前嘅事咯。
咁都未算吖，旺角豉油街有幢安置大廈，夜晚僅一成單位有燈光，即係話九成單位冇人住。其他嘅亦唔好得去邊，深水埗荔枝角道嘅安置大廈唔止住宅單位十室九空，連樓下地舖亦丟空。正如有住戶質疑，隔籬單位十五年都冇人搬入嚟，「點解唔畀人住」？
係咯，今時今日房屋需求殷切，連廁所劏房都成為搶手貨，無殼蝸牛唔理好醜，但求有瓦遮頭。點知市建局嘅安置屋就大量丟空，簡直係暴殄天物，浪費資源。有身兼市建局非執行董事嘅立法會議員指出，呢類大廈受到地契等限制，只能安置受重建影響嘅居民，之不過咁，現時土地資源彌足珍貴，當局應以臨時方式出租畀有需要居民，以紓緩愈來愈嚴重嘅住屋問題。
冇錯嘞，制度係死嘅，人係生嘅，既然安置屋長期丟空，點解唔靈活變通，以求物盡其用呢？講到底，都係一個「懶」字了得，政府部門又好，公營機構又好，一向抱住「多做多錯、少做少錯、唔做唔錯」嘅心態，懶得就懶，得過且過。試諗吓，如果呢啲樓宇屬於官老爺自己嘅，會唔會長期丟空吖？
話時話，港產官僚浪費房屋資源早就唔係新聞，審計署之前發表報告透露，七百幾個高級公務員宿舍中，近兩百個「過剩」，加上各部門持有近五百個未用過嘅宿舍，總共有七百個宿舍單位無人住，部分甚至已經丟空十五至十七年，問你服未。美國前總統列根話過，政府唔能夠解決問題，因為政府本身就係問題。真係一啲都無講錯，叮！
App下載
