主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7722
地產新聞
樓市出更:估價唔怕辣 9成屋苑升
(太陽) 2015年4月1日
樓價高企,令到首季二手樓再有量跌價升情況。十大屋苑交投按季跌24%,中上價樓主導嘅鰂魚涌太古城交投勁跌45%,但樓價就升逾13%。二月底政府再出招,似乎對個市無咩影響,銀行估價繼續上升,根據滙豐銀行網上估價,20個主要屋苑單位,佔九成估價仲升緊,其中沙田中心單位按月升4.8%標青。

劉Sir睇番中原嘅數據,上個月十大屋苑有166宗成交,按月雖然上升番8.5%,但上季全季只得670宗,按季就少咗24%。

太古城市靜價飆13%

除咗荔枝角美孚新邨交投量按季有升之外,其餘九個屋苑全部都跌,而太古城最慘,跌幅超過45%,但上月平均實用呎價按季就升最多13.3%,至於其餘九個屋苑,平均呎價按季都升1.33%至7.32%。

中原趙鴻運話,太古城上月只有11宗買賣,同沙士嗰陣時差唔多,但就有58宗租務成交。據市場人士講,屋苑鳳山閣有個連天台兩房戶,近日以998萬元賣出,實用呎價1.7萬元。

該行盧鏡豪話,鴨脷洲海怡半島上月有41宗租務交,但買賣只得9宗,個價亦都唔肯落,好以19座中層G室賣1,350萬元,實用呎價1.52萬元係高價。

其實市靜已經有人加快出貨,世紀21日昇話,北角添金閣低層開放式戶賣303萬元,實用呎價1.66萬元,扣埋額外印花稅(SSD)約一年賺62.9萬元。

劉Sir聽中原嘅老友講,長沙灣喜雅1座中層C室賣638萬元,約三年賺兩球;上水維也納花園3座低層G室減22萬元,以438萬元賣出,低市價10%,實用呎價6,470元。美聯鄧熾軒表示,元朗尚悅3座高層E室售約408萬元,一二年十月至今升值約10%。

市區住宅估值料跑輸

睇番銀行估價,滙豐銀行網上估價嚟睇,20個主要屋苑單位之中,有18個估價仲係升緊,升幅比較好依然係新界區單位,好以沙田中心佳寧大廈低層戶,最新上月初估價係375萬元,按月升咗4.8%,依家去到393萬元;而東涌映灣3座中高層F室同將軍澳新都城2期2座低層戶,分別升咗3.5%同2.7%。

反而市區屋苑估價升幅就慢咗,6個升幅少過1%嘅單位之中,佔咗4個係市區樓,好似奧運站維港灣6座中層戶最新估值711萬元,按月只升0.3%,而鴨脷洲海怡半島2座高層戶同鰂魚涌康怡花園E座中層戶,估價按月分別升0.4%與0.6%。

劉Sir