主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7441
地產新聞
樓市出更:西區追灣仔 呎租僅差兩蚊
(太陽) 2015年3月25日
港鐵西港島線通車,西區交通大大改善,唔單止令區內物業價值提升,連租金近兩個月升幅都明顯咗。用同樣屬於市建局重建嘅3個項目嚟睇,西區泓都同帝后華庭,今年頭兩個月平均建築呎租升咗約14.5%同13%,而灣仔尚翹峰同中原地產百大屋苑平均呎租同期就反而跌咗0.1元,令到港島西同灣仔區呎租差幅由去年底6元,收窄至依家嘅2元。

中原地產黃良昇同劉Sir講,自從去年十二月二十八日港鐵西港島線通車之後,港島西區主要樓盤租金明顯升咗,今年到依家普遍暫錄雙位數升幅。

尚翹峰呎租40微跌

以灣仔同西區3個市區重建項目嚟睇,根據佢哋新簽嘅租約統計,以建築面積計算,泓都二月份平均呎租已經去到38.8元,比去年十二月33.9元,升咗約14.5%;而帝后華庭呎租最新係37.2元,比去年底32.9元升咗13.1%。至於無受惠通車嘅灣仔區,其中尚翹峰二月份呎租40.1元,雖然連續三個月企喺40元嘅高水平,但比起去年底就每方呎微跌0.1元。

其實,依家西區部分單位呎租已經去到40元或以上,就好似泓都有個3座高層C室,喺今年初以建築呎租約45元租出,而帝后華庭2座高層C室年初都以呎租40元租出咗。

事實上,喺西港島線通車之前,區內嘅租金都已經蠢蠢欲動,去年升幅都跑贏大市,好似港島西去年第四季平均建築呎租約33.2元,按季升咗4.4%,至於百大屋苑第四季平均呎租25.2元,按季就只係升咗3.7%。

昇柏山入伙放租30個

第二季陸續有多個新盤入伙,包括荃灣昇柏山、環宇海灣及大埔嵐山等。中原龐耀昌話,昇柏山暫時已經有約30個租務放盤,兩房同三房單位各佔一半,有個低層左翼E室兩房單位,實用面積513方呎,月租叫價約1.6萬元,實用呎租約31.2元;另一個中層右翼B室三房戶,月租叫價約2.2萬元。而屋苑暫時仲未有買賣放盤。

該行招錦昌表示,沙田河畔花園今個月暫錄約14宗租賃成交,其中一個A座高層連天台戶,建築/實用面積385/269方呎,享單邊河景,業主原本開價月租1.2萬元,最終以1.15萬元租出,建築/實用呎租約29.9/42.8元,仍較市價高約一成。

劉Sir