主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6862
地產新聞
樓市出更:國際零售商22%謀港開舖
(太陽) 2015年3月20日
依家本港零售市道麻麻哋,不過劉Sir發現,原來喺國際層面嚟睇,香港仍然係國際零售商最想進駐嘅地區之一。根據一間外資行發表嘅一份有關國際零售商進駐情況報告,二○一五年有22%零售商想在香港開業,全球排名第六,而內地佔比例達28%,全球排名第四。喺亞太區,內地就排首位,至於全球首位係歐洲的德國,佔有比例高達40%。

劉Sir睇到世邦魏理仕尋日發表嘅《國際零售商活躍指數》報告,話有22%受訪零售商打算一五年喺香港開業,全球排名第六,而內地就以28%排行第四。

淨係計亞太區國家或城市,內地同香港已經包辦首兩位;而全球最受追捧就係德國,連續兩年第一位。

該公司香港商舖服務部執行董事連志豪話,雖然零售商因租金高昂同個人遊旅客對奢侈品需求下降,而對擴充步伐採謹慎態度,但係本港市場可以為零售商帶嚟嘅利潤,依然係全球數一數二。

租金成本增 擴充審慎

面對營運成本及租金上升,該公司亞洲零售代表主管Joel Stephen話,零售商喺新店選址會更為審慎,更需要策略性房地產組合管理,地點方面就會考慮曾經有理想成交嘅或有新項目發展概念地區。

報告指,具大型擴充計劃並打算開設逾40間新店嘅零售商,數目減少至5%。

該公司亞太區租賃市場研究部主管許育誠就話,今年有43%受訪嘅零售商想係亞太區開舖,但隨着消費模式轉變,零售商將會更重視店舖網絡分布。

銅鑼灣10物業億八沽

近排高檔零售商減少喺核心區開舖,但食品店依然可以「站穩陣腳」。消息話,銅鑼灣白沙道單號一個由澳門手信食品店租用多年嘅地舖,面積約500方呎,最近以約28萬元續租,呎租約560元。

港置吳家寶話,深水埗高登電腦廣場2樓有11個舖位放售,每個舖面積約222至280方呎,入場費約250萬元,買家可獲兩年5厘租金回報。另永義實業(00616)同永義國際(01218)公布以總代價1.83億元收購銅鑼灣勿地臣街10個物業。

劉Sir