主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 8433
地產新聞
樓市出更:新盤變陣趕季內出貨
(太陽) 2015年3月11日
話咁快第一季又將近尾聲,發展商急急壯大推盤陣容搶客。長實部署開售已久嘅將軍澳日出康城緻藍天,樓書昨日終於上咗項目網站,估計最快月內推售,同系紅磡悅目亦落實喺本周六發售加推76伙。至於信置(00083)等昨日都突擊晒冷式盡推大埔溋玥.天賦海灣餘下單位,當中95伙分層戶價單平均呎價14,197元,折實平均呎價12,705元。

緻藍天作為今年其中一個開售大盤,動向一直好受市場關注,劉Sir亦都唔執輸,昨日立刻上網檢視一下呢本新鮮滾熱辣樓書,項目共提供1,648伙,每座物業都會有獨立命名,全部單位都係三、四房大宅,擺明強攻換樓市場。

悅目收180票 周六賣

而每戶面積680至1,142方呎,後者更係日出康城目前面積最大嘅標準戶。據悉,項目估計最快月內開售,示範單位有機會短期內開放。

同系搶攻上車客嘅悅目,昨日都落實咗新銷售安排,上周六加推的76伙,將喺本周六以抽籤形式發售,呢批單位價單售價由696.5萬至994.8萬元,實用呎價16,198至23,135元。據聞,截到昨晚已經錄得逾180張入票。

至於日前啱啱落實咗大嶼山BOTANICA BAY招標安排嘅信置,昨日又突擊推出溋玥.天賦海灣新例後首張分層單位價單,涉及95伙,價單售價1,101.7萬至3,225.2萬元,價單最高售價優惠可達12.5%,折實售價1,016.31萬至2,822.05萬元,折實呎價10,355至18,700元。

凡購買第10座任何單位,可享裝修現金津貼80萬元。項目兩個全新裝修現樓示範單位今起接受預約參觀。至於呢個盤9座洋房就會喺今個月十四日起招標,六月十一日截標。
天璽快睇樓 月內售

另外,新地(00016)今日會首度安排傳媒等參觀西南九龍天璽全新現樓單位,估計最快日內可以開放畀有興趣人士參觀,有機會月內發售。

恒地(00012)昨日都公布咗長沙灣曉悅20伙嘅價單同銷售安排,又係星期六起發售。

劉Sir