樓市出更:福榮街重建「細」掀競逐

新聞資訊 > 地產新聞 返回
瀏覽人次 : 6981
地產新聞
樓市出更:福榮街重建「細」掀競逐
(太陽) 2015年3月9日
近排迷你住宅單位已經成為咗市場新寵,發展商亦傾向愈起愈細。之不過,今個禮拜五截標嘅市區重建局深水埗福榮街重建項目,罕有咁設有單位面積下限,規定單位實用面積唔可以小過260方呎,變相禁止發展商打造劏房式迷你戶嘅可能性。不過,劉Sir啲測量師老友就覺得,項目規模細細,呢啲限制對競投氣氛唔會有太大影響,估計每方呎樓面地價最多約莫4,600元,估值最高大約2.49億元。

呢個深水埗福榮街重建項目,係今個財政年度推出嘅最後一個市建局項目,地盤面積大約6,415方呎,其中住宅同埋商業樓面,就分別佔約48,127方呎及6,017方呎,預計將來會提供大約90個住宅單位。

收益愈高 分紅愈多

劉Sir收到風,今次市建局會繼續沿用一貫分紅模式,中標財團如果將來賣樓收益去到6.6億元,即係呎價大約12,190元,就要按比例作出分紅,達標後嘅首3,000萬元要分紅20%,而第二同埋第三個3,000萬元就要分紅30%及40%,而達標去到9,000萬元以上,分紅比例就要50%。

較特別係今次項目破天荒咁加設咗單位面積下限,最細實用面積唔可以細過260方呎,同時項目嘅半數住宅單位,實用面積亦唔可以大過480方呎。

邀26財團 周五截標

理想城市企業估值部主管張聖典覺得,雖然項目加咗單位面積下限嘅條款,但實用面積260方呎已經好細,睇怕都唔會影響發展商嘅競投部署,預期呢個項目都會有一定嘅參與度。

佢又估計,呢個福榮街項目每方呎樓面地價大約4,000元,以此計算,估值約為2.17億元。至於依家市場估值上限價,就約莫2.49億元左右,每方呎樓面地價約4,600元。

劉Sir仲知道,今次市建局一共邀請26家發展商入標競投呢個福榮街項目,而獲得邀請嘅財團就包括長實(00001)、新地(00016)同埋萬科置業(香港)等各類型發展商。

至於下個財政年度,市建局都係缺乏大型供應,估計全年推出嘅重建項目,合計只係可以提供約840個單位,比今個財年大幅減咗約70.4%。

劉Sir