主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7838
地產新聞
樓市出更:住宅租金回報創新低
(太陽) 2015年2月24日
樓價升唔停,不過,租金就受季節性影響,所以上個月百大屋苑平均實用呎租只維持喺33元,屬於高位橫行,由於過去一年租金升勢跑輸畀樓價,搞到租金回報率跌到約3.79厘嘅新低水平。

中原研究部黃良昇同劉Sir講,根據佢哋公司新簽嘅租約統計,一月份全港百大私人屋苑平均實用呎租33元,同舊年十二月一樣,應該係受到季節性租賃淡季影響,令到私人住宅租金追唔上,不過仍然屬於高位橫行,相信過咗新春長假之後,租金會平穩向上升番。

太古城漲2.3%標青

睇番十大屋苑,上個月以鰂魚涌太古城嘅呎租升幅最好,一月份平均實用呎租有40.7元,單月升咗2.3%;其次係同區康怡花園同柴灣杏花邨,一月份實用呎租分別係36元同36.8元,按月升咗1.4%同1.1%。同期有啲屋苑呎租回落咗,好似紅磡黃埔花園平均實用呎租按月跌2.3%,去到得番34.6元。

萬元樓下不足一成

該行趙鴻運話,太古城新春期間買賣停滯,租賃成交亦一樣減慢咗,今個月到依家暫時得28宗租賃成交,平均實用呎租約40.7元,相信今個月計,未必會去到上個月有49宗嘅水平。

市場最近有個紫樺閣高層G室,實用面積1,015方呎,享有全海景,以月租4.3萬元租出,實用呎租約42.4元。

美聯劉嘉輝亦都話,根據佢哋公司嘅百大屋苑,舊年全年租金升咗約7%,明顯跑輸比樓價,令到租金回報率都回落到新低水平。

喺未扣除管理費、差餉同其他費用情況下,一月份租金回報率跌到得番約3.79厘。而上個月,月租萬元或以下嘅租務個案佔比例就只係得9.2%,至於月租10,001至15,000元嘅個案就佔約28.2%,比例係最多。

另外,中原陳廸豪話,沙田第一城今個月暫時錄到約14宗租務成交,依家租盤有約124個。而屋苑喺年初四都錄到一宗租賃成交,個單位係37座高層C室,實用面積304方呎,兩房間隔,以月租1.15萬元租出,實用呎租約37.8元,比市價略高約5%。

劉Sir