主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 7571
地產新聞
樓市出更:私宅落成萬八伙在望
(太陽) 2015年2月17日
政府積極賣地建屋增供應,嚟緊要供應達標「其實唔難」,有代理估計出年私宅落成量可以逼近1.8萬伙,到時就會創出十二年嚟新高。劉Sir都知,唔少大型項目都陸續獲批圖則,好似新地(00016)嘅前北角邨東面部分住宅項目,就獲屋宇署批建9幢分層住宅,總樓面超過90萬方呎。

呢幾年政府頻頻推地,好快會踏入供應收成期,劉Sir老友中原黃良昇話,揀咗72個可望出年落成嘅私宅項目,涉及單位約莫17,626伙,計埋其他零碎供應,全年落成量可逼近1.8萬伙。

新界佔萬三 14年最多

佢話有望落成嘅項目當中,有27個位處新界,落成單位預計約12,903伙,到時會係新界區近十四年來落成最多。

單計元朗嘅6個落成項目,就涉及約4,695個單位,而將軍澳可以落成嘅6個項目,亦有約3,665個單位。至於九龍區同埋港島區,出年落成單位就料約2,359及2,364伙。

劉Sir知道,其實屋宇署近呢幾個月批出嘅圖則,唔少都係政府批出嘅項目,該署喺舊年十二月批出嘅18份建築圖則,有8項係住宅及商住發展,當中包括新地前北角邨東面部分住宅項目,准建共9幢13至18層住宅,住宅及商業樓面約57.8萬及32.3萬方呎。

另外將軍澳南再有項目獲批圖則,華懋嘅將軍澳第68B1區限量項目,獲批發展6幢11及17層高分層住宅,另設5座4層高洋房,總樓面超過82萬方呎。

動工量反跌 僅6257伙

睇返最新落成同動工情況,舊年十二月就有約2,577個單位落成,按月大增約兩倍,累計全年落成單位加埋約15,719伙,按年顯增約九成,係八年以嚟最多。反觀動工量就按年少咗約36%至約6,257伙,係四年以來最少。

另地政總署最新資料,最新完成補地價嘅項目包括葵涌打磚坪街54至56號,以5,140萬元完成咗補價。劉Sir知道地盤由佳明(01271)持有,將發展數據中心。

另房協沙田小瀝源居屋項目同港鐵(00066)將軍澳日出康城第5期,亦以11.3億及20.6億元完成補價。

劉Sir