本港零售業環境顯著轉差，一線旺區街舖風光不再，舖王都更加首當其衝，罕有出現簽咗約再劈價先走到貨情況。早喺今年初簽咗臨時買賣合約，協議以約1.85億元成交嘅銅鑼灣波斯富街地舖，由於政府公布嘅最新零售數據係海嘯之後最差，買家要求重新傾價，最終業主肯劈價1,200萬元，以1.73億元賣出個舖，實用呎價超過144萬元，但仍穩守本港舖王寶座。
政府早前公布四月同五月份本港零售數據資料，鐘錶珠寶類銷貨值分別顯著下跌近40%同超過24%，其中五月份整體零售額更加係金融海嘯後最差嘅五月份。
有資深代理同劉Sir講，個市咁差，依家舖位售價同租金已經跌緊，由於一線區好似銅鑼灣舖位供應唔多，所以唔係咁明顯，不過遲啲都會浮晒出嚟。名成鄺鋩啱啱同劉Sir講，佢哋喺今年二月促成嘅銅鑼灣波斯富街77至83號地下N舖，啱啱完成交易，成交價約1.73億元，以個舖實用面積約120方呎計，呎價高逾144萬元，成為本港舖王。
資策買入 茶莊租回
上述舖位買家係資本策略地產（00497）或有關人士，個呎價有機會問鼎全球最貴，比較本港第二貴舖位實呎價90多萬元高出約50萬元。不過，佢話啱啱完成交易嘅舖王，成交價比簽臨約嗰陣低咗1,200萬元，因個市差咗，雙方再傾幾個月，原業主英記茶莊終肯減價，兼售後租回半年至明年二月，月租約38萬元。據土地註冊處資料，之前登記臨約成交價約1.85億元。
受到旅遊業增長放慢同遊客消費模式轉變影響，今年上半年零售業面對唔少阻力，劉Sir睇到高緯環球尋日發表嘅「二○一四年上半年香港商廈及商舖租務市場走勢研究」，報告話現時一線地段嘅商舖空置率都仲係低，但二、三線街舖嘅空置率喺過去六個月就升咗好多，核心區商舖租金仲略為調整咗2%。
該行報告又話，舊年十二月到今年六月，本港主要地區商舖空置量都上升。其中以旺角區最重災，由去年底約21個空置舖，升到六月份嘅48個，升幅高達1.29倍。
核心舖租料下調3%
報告又話，上半年商舖續租同新租約嘅平均租金增幅約40%，比起舊年同期有60至70%跌所唔少，預期下半年核心區商舖租金會相對穩定，但都有可能下調2至3%。至於二、三線地段租金跌幅有機會達5至8%。
劉Sir
App下載
