暑假檔期係租金爆升嘅時機，依家樓市正值高峰期，所以今年住宅租金走勢特別勁。中原同美聯兩間代理行嘅最新數字顯示，主要屋苑喺六月份嘅平均建築呎租約23.2及24.01元，按月錄得約1.3%及1%升幅，同樣創咗有紀錄新高。
劉Sir知道近排租金走勢唔錯，唔覺唔覺仲創埋歷史新高。老友中原黃良昇話，據該行嘅新簽租約統計，今年六月全港85個大型私人屋苑嘅平均建築呎租大約23.2元，比起五月升咗約1.3%，仲升穿埋舊年十月錄得約23.1元高位，創咗九五年有紀錄以來歷史新高。
太古城建呎租破33元
劉Sir再睇埋美聯「租金走勢圖」嘅資料，發現本港100個主要中小型屋苑，上月嘅平均建築呎租錄約24.01元，按月升咗約1%，亦打破舊年三月該行錄得嘅23.93元呎租高位，創有紀綠新高。
其中鰂魚涌太古城上個月租金升勢最勁，平均建築呎租按月升約7.8%，去到約33.1元。
不過，綜觀上半年租金升勢，又唔算話好突出，中原同美聯嘅數據顯示，今年上半年整體租金只係升咗約0.9%及1.3%。
美聯劉嘉輝覺得，嚟緊下半年會有唔少新項目入伙，相信租金升幅將會放緩。其中最近入伙嘅元朗溱林，依家已經有約40戶入咗伙，至今累錄約15宗租務成交，個別租金創咗洪水橋私宅新高，成交月租介乎約1萬至連埋車位2.3萬元。
事實上，政府近年狂谷供應，可以預期嚟緊入伙新盤會愈來愈多。與此同時，政府土地收益亦水漲船高，理想城市張聖典話，上個財政年度政府推咗46幅土地，成功批出咗45幅，為庫房帶來約704億元土地收益，按年顯增約17.9%。
赤柱申重建酒店遇阻
另外，赤柱大街86至88號（船屋餐廳）早排向城規會申請重建1幢10層高酒店，提供28間客房，不過諮詢期收到嘅23份申述，全部都係反對意見，包括來自檳城同埋本港外籍市民等提出，主要認為要保留藍屋餐廳嘅特色及赤柱休閒文化。
土瓜灣譚公道103至107號酒店重建申請，收到40份申述，亦係全部反對。
劉Sir
App下載
