新聞資訊 > 代理新聞 返回
瀏覽人次 : 2907
代理新聞
樓市出更:代理網上廣告 違規倍增
(太陽) 2016年1月28日
依家資訊咁發達,網上廣告多元化,好容易出現違規,特別係呢幾年地產代理監管局對網上廣告都管得幾緊,劉Sir知道,原來舊年該局錄到網上廣告違規情況,一共有27宗,比起一四年嘅14宗大幅飆升超過九成。另外,地監局舊年巡查咗大約30個網上平台,發現2宗疑似從事代理工作網站個案,提醒吓大家,網上交易確係潮流,但都要持有代理牌照先得。

地監局韓婉萍同劉Sir講,該局舊年抽查網上物業廣告一共602次,由主動巡查而發現有違規嘅個案有14宗,連同接獲投訴嘅個案,舊年合共有27宗網上廣告嘅違規個案,大部分都係由代理疏忽所致,相比起一四年多出超過九成;而舊年亦處理咗15宗相關的違規個案,其中有10宗指控成立。

韓婉萍仲話,該局舊年一共巡查咗約30個網上平台,發現咗2宗疑似從事代理工作網站個案,強調即使係網上交易,推介樓盤都要持有代理牌照,對於業主自讓盤,地監局都會「放蛇」進行巡查睇吓真定假。

代理買樓做足申報

樓市走勢回落,劉Sir知道近排有部分代理入市執平貨,韓婉萍話,對於市況高低唔方便評論太多,但如果代理入市係屬於客戶,就要表明代理身份同埋申報,而最近代理買樓個案都有申報,所以無立案調查。

生意難撈,好多代理都爭生意大打出手,韓婉萍提到,舊年多宗打鬥事件,只有1宗證實係牽涉持牌代理,其他係無牌代理或見習生,但地監局會關注情況,並會就肇事見習生向其管理層了解事件。

交投靜 投訴少兩成

地監局梁永祥話,舊年經濟氣候不穩,交投減少,投訴相對亦少,全年收到315宗,比一四年少咗21%,連續六年下跌,唔少主要投訴類別都有改善,特別係「未有與客戶訂立或解釋地產代理協議」嘅投訴,少咗35%至約25宗,投訴個案當中有43宗與一手住宅物業有關。

舊年地監局巡查咗77個一手新盤合共1,218次,按年多咗約7%,而巡查咗地產代理舖共1,612次。

另外,該局舊年亦向376名代理採取行動,按年減少18%,其中44名遭撤銷牌照,主要係破產令或有刑事定罪紀錄。

劉Sir