主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 4387
代理新聞
代理Sell樓 標語吐心聲
(東方) 2016年1月9日
近排樓價插晒水依然交投冰封,連絲絲行過地產代理行都感受到寒意。

話說有日行過代理行,發覺啲賣樓標語變晒樣。之前市道好時嗰啲「一閃即逝」固然已經逝去咗,不過連平時見開嘅「四房望海」、「家庭最啱」、「還價即成」都變晒做「不要炒魷」、「嫁入豪門」、「老公聽話」!何止係新年願望,直頭絕對反映代理心中所想。

近呢幾個月,二手價閒閒哋跌過百萬已經唔罕見,但都仲係唔覺有人爭買,有開咗十幾年嘅細行話已經四、五個月冇開個買賣單,話呢行「沒有明天」。連業界人士都預計,農曆新年之後會有500至600間地產代理要摺埋。

變成「不要炒魷」「嫁入豪門」

咁嘅時勢,有邊個唔諗住「不要炒魷」,最好就係「嫁入豪門」,入咗門就梗係想「老公聽話」。睇見咁絕望,絲絲行過都差啲停低祈禱。

但最終敵唔過寒意,走快兩步過咗港島區,點知見到吉舖街招個代理名叫「方開單」!佢阿爸係咪咁有先見之明幫佢改個咁嘅名就唔知,不過佢好想開單就係人都知囉。嗰一刻,絲絲好想打電話去慰問吓佢開到單未。

余絲韻