過去三季樓市出乎意料反彈回升，即使佔中事件或有影響，但唔少中小型地產代理近排都「復活」擴充；其中活躍粉嶺二手市場嘅六福行，啱啱喺區內新開第三間分行。而集中發展元朗區嘅建富物業，今年業績轉虧為盈，之前連環關閉區內兩分行，啱啱亦重開1間全新分行，仲話唔排除會進軍其他區擴展；相反，部分大型地產代理暫未有擴充部署。
代理人數持續回升
樓價愈升愈有，地產代理經營環境亦由年頭水深火熱突然好轉，整體持牌代理人數自今年五月起回升，至八月份已回升至35,595人。
劉Sir認識多年嘅世紀21奇豐，啱啱重新喺火炭區重開分行，新舖面積約700方呎，可容納逾10個代理，該行周淑萍話，中細價物業市場交投持續萎縮，好似過往成日每月錄得過100宗買賣嘅沙田第一城，近月普遍僅錄約20至30宗成交，所以加開中上價市場分行擴展「版圖」，選擇喺火炭加開新分行，同時增聘人手。
至於喺粉嶺區紮根多年嘅六福行，第三間位於花都廣場分行亦已開業，該行吳家榮同劉Sir講，上半年粉嶺二手交投回升，佢哋公司嘅市場佔有率增加，儘管「佔中」對樓市造成短期影響，但為擴展二手市銷售點，仍然喺區內開設新分行，新舖面積約300方呎，增聘4名員工，現時在區內已設3間分行，明年會考慮再加分行數目。
一直主力發展元朗區嘅建富物業，該公司冼杜強亦都話，公司啱啱喺元朗YOHO Town附近開設新分行，舖位面積約400多方呎，目前公司喺元朗區共有兩間分行，屯門區有1間，人手共20多人。佢透露，公司今年每月都有錢賺，同舊年虧損情況明顯有改善，未來目標喺元朗區再開1間分行，有機會亦會進軍其他地區。而佔中因素只係短期心理影響，對公司經營唔會造成太大衝擊。
大行保守拒開新店
相反，大型代理行表現較保守。利嘉閣廖偉強話，受辣招影響，該行暫時未有增開新店部署，但維持年底前增聘300人目標。港置伍創業亦都話，舖位租金持續向上，今年未必再開分行。
劉Sir
App下載
