一,常言道,don’t make stupid people famous 。虽然有读者要求讲张华锋,但其实我唔想。明眼人都知其实佢都系出来搞下气氛。见到大家都识笑,咁咪几好罗;虽然苦笑,但都系笑吖。我都唔钟意笑人嘅;咁 mean,唔系我风格罗。
二,讲返制度。成个广义嘅金融业界,立法会里面,最少有三个代表,分别系「金融」、「金融服务」同「保险」。我够胆讲,就算日日中环出入嘅朋友,都未必识分呢三个界别系乜。其实「金融」系银行,「金融服务」系证券,「保险」咪就系保险罗。当然,呢三个功能组别全部都系「团体票」,即系公司票,所以对大多数从业员来讲,呢三个界别嘅代表,确实冇乜认受性,唔识一啲都唔出奇。
四,无独有偶,呢几个界别分别有近乎独立於政府行政机关嘅监管系统:金融由金管局睇,证券有证监,保险都有保监。几个功能组别议员嘅出现,好大程度都系当年业界 lobby 出来嘅结果,叫做有个代表同大台刁下。当然,业界同监管机构其实都有沟通同默契,好多所谓嘅规矩,都系一早夹好。
五,话虽如此,证券业同证监嘅关系就认真嘛嘛地。点解呢?嗱,呢种高层次少少嘅问题,我就有兴趣喇。
六,首先要明白,除咗以上讲嘅三个「广义金融业界」,好多有自我监管嘅行业或专业,都会有个功能组别代表,例如会计法律。所谓监管,银仔另一面其实就系 Cartel ,呢个道理相信大家都明。当业界响立法会有个议席,就代表有票可以交换可以同政府做场戏;呢个亦系点解香港系一个「寻租型经济」。
七,银行系百业之母,大家都识讲。从前,银行就银行,保险就保险,证券就证券。不过,银行相对另外两个行业,有两大优势:资金成本低同埋零售客户层面更广。唔单止香港,全世界嘅银行都踩过界做埋证券同保险。
八,假如我话银行业先系香港最大寻租者,真系不失为过。好多人眼中,因为地产财团最 visible,所以成日「地产霸权」咁讲。我唔否认,衣食住行甚至电讯同其他公共事业,都有地产财团嘅指模,不过大家都唔好忽视银行业嘅足迹。买楼都要做按揭啦,系咪?你买层楼,当中有几多系地价?计埋楼按利息,其实边个赚最多?成个经济食物链,最上层一定系政府,然后就系银行。
九,讲返「广义金融业」,证券同保险,相对银行业,其实竞争比较大,结构亦都比较复杂,过去廿几年亦经历比较大嘅转变。
十,保险业,不但好彩有强迫金帮补下,政府又推咩自愿医保,虽然唔系话超赚钱,但都叫有生意做下。另外,过去十年八载,香港保险公司做唔少大陆保单,大家心照咩事啦。
十一,证券业,我觉得过去十年,其实系寒冬;虽然每日交投都有好几百亿,但有几多真系零售客吖。今时今日证券业最主要嘅收入,亦已经唔再系客仔佣金。咁证券行点维生呢?有啲做财富管理、资产管理。亦有证券行帮人投资移民,做埋 proof of funds。又有啲证券行谂做 program trade 之类。不过,赚埋都唔够交冷气费。有啲直头转营,早过一带一路走去东南亚做融资同投资。
十二,不过,讲到尾近年证券行最主要嘅生意都系 corp fi 同借钱。所谓 corp fi,讲出来好听,但其实咪又系将啲狗屎垃圾包埋一旧推上板。资金咁泛滥嘅环境,要资金,又驶乜上市?上市为乜?真系为集资咩。心照啦。所以,证券业又系「广义金融业」里面,出最多蛊惑嘅一门。
十三,戴头盔先。有蛊惑,唔代表监管机构系唯一答案。监管机构唔可以只眼开只眼闭,我明。但系为做而做嘅事,好多时又杀错良民(假如呢个业界有良民嘅话)。我嘅观察系,过去好多年,证监做嘅嘢,都系杀错良民居多;甚至专杀良民。
十四,点解?响灰色地带搵食嘅人,一定会睇清睇楚制度,搵啲唔容易堵塞嘅漏洞,否则好难长久咁搵钱。当然,呢个亦都系业界代表发挥佢协调功能嘅时候。不过坦白讲,业界代表可能真系得到部份人信任,但同证监周旋呢,就似乎唔够能量。点解呢?真系唔可以忽略人嘅因素;西环信得过,唔代表对监管机构勇武。话说肥老板上次都面临挑战,叫做险胜啦。
十五,香港金融业,有人以为最开放嘅环节,系证券业。少年,你太年青了。港交所一所独大,呢个系万恶之源。大家记唔记得绿色通道事件?又记唔记得港交所同证监就上市审批曾经角力?香港证券业嘅黑气,竟然系来自一个装修富丽堂煌嘅交易所。
十六,曾经我同某位都几开明嘅前财金官员讨论港交所独大,佢话:「香港从来都冇法例话唔畀有第二个交易所喎。」「咪玩啦,点申请呀?」最后,讨论不了了之。过多几年,嘿,有个叫张震远嘅人,又真系整个商交所。之后嘅事,大家都知,不多讲。
十七,香港国际金融中心地位稳如泰山?大家都担心法治受威胁,亦有少数人明白联系汇率畀香港最大嘅资金深度。不过,真正被忽略嘅系,香港金融业个种权力同利益嘅勾结,以及权力同利益高度集中带来嘅风险;包括不思进取嘅风险。
十八,坦白讲,我唔怕深圳竞争,我最怕系无竞争,又或者啲假到无伦嘅假竞争。至於咩 Fin Tech,Insure Tech,笑死人咩。真正 Disruptive 嘅创新,唔会响香港出现,就算出现都唔会被 Adopt。讲完。