攻一守二走出去

　　近日筆者同一位客戶交談非常有啟發性，客人從美加回流已經是花甲之年，年輕時移民，年紀大了想返香港居住，但本港物業長年租出，遂萌生置業念頭，更加想買層安樂窩吸引ABC（外國出生長大）子女回港，做個中國地道香港人同聲同氣，真正24孝父母，非常愛錫子女！客人是實業家，壯年時候早在廿年前已經在世界各地有投資物業，80年代在九龍塘更擁有獨立屋，可以話係投資高手，今天客人非常謙虛問筆者點睇後市，筆者是後輩唔敢班門弄斧只能夠道出自己嘅前線經驗。今時今日買樓自住可以，或者博士話齋逢三退一都ok，投資炒賣就困難D，如果從以上case能力可以負擔到的話從另一角度要打造長期安樂窩，那買就好過交租，因為香港業主喜歡年年調整租金，如果習慣經常搬遷，可以租住先，但係今時今日「成功須父幹」，加上24孝父母，層樓父母送首期，子女自己供得起搞得掂已經非常能幹了，有時候親情好難用錢去衡量。

　　筆者作為香港專業地產顧問商會副會長，經常在理事會學習到多位前輩的經營理念，筆者個人觀點，現時經營地產代理生意要生存可以用一句話形容「攻一守二走出去」。意思係目前香港地產市道，購買力集中在發展商，一手劈價搶二手客是常態，一手樓定價仲平過二手樓價格，基本上分行收到街坊客看完二手再看一手，都被一手樓吸引，作為地產代理一定要增值，認識一手各大樓盤知識是必須！搶「攻一」手市場。

　　樓市轉角，業主持貨力強，買家觀望，二手租務市場急增，大量上車客轉買為租，駐守分行從業員要堅守崗位（穩「守二」手租務生意），特別要同業主有良好溝通關係才摸到業主底價，成交自然快人一步！

　　「走出去」是要認識外國樓，近期投資新趨勢興起海外置業，因為香港人存款底厚，97年魚翅撈飯年代香港人銀行存款才兩萬億，近期聽銀行大班講2015年已超越十萬億，可以話存款水浸！加上外國樓有些地區外匯低水，港元強勢，藏富於外，水向低流分散投資，純投資角度，筆者個人觀點今天在東京或吉隆坡投資物業，3或5年後升幅一定比香港多！其它地方樓價指數筆者正在努力考察，仍然學習中！總括一句作為前缐從業員，要做逆市奇葩最少具備以上三把刀才可以淡市自強。