2016大碌大碌

　　昨晚和網主及幾個Whatsapp談話，我話如果談話內容屬實，又有人將之放上網，樓價一個月內跌一成，所以，今早我睇回應，網主話暫時將佢歸納在淡友行列，其實是有道理。

　　早兩日我去美聯新春酒會，見到差不多所有地產商售樓主管都在場，老趙在，霆哥都在，記者問我今年樓價點睇，細價樓會不會爆煲，在咁樣場合，我點會話爆，我講下跌一成，屬於調整，爆唔爆，在場的人心裡有數，訪問片段出街，話我改口，細價樓不會爆煲，那些急就章訪問，怎樣可以作準，大家應該明白，我在網站，明報，iMoney都為今年樓市作出預測，是唔會改，大家可以參考，今年預測樓市不是很好，但我知道預測大多數唔準，因為，樓市的表現將會被我的預測更壞，所以，我將題目叫2016大碌大碌。

　　今年樓市沒有小陽春，除非地產商肯大幅減價，兩種結果都表示樓市不佳，現在最難預測的就是中原指數連跌幾多個星期才會連續兩個星期反彈，我估計，今年上半年不會出現。

　　財務公司現在已經開始劈價賣貨，不足之數將會向加簽擔保的親人追討，結果可能導致擔保人賣樓，有人會話我危言聳聽，台灣有一個賣麻油雞的男子，他曾經破產，佢細佬因為同佢簽擔保而跳樓，所以，擔保人賣樓又有什麼出奇，財務公司在升市時對債仔是溫和，跌市時就很粗暴，下半年大家就會見到，總之，有向財務公司借錢的債仔就要小心，單是今個月將會出現500個銀主盤待拍，我在爆煲論講三年內有一萬個銀主盤時被人鬧到反肚，現在，鬧我的人都忙於追數，因為，他們自己都被人追數，那些借出去的錢都是問別人借回來，人家要收回，你叫財務公司點做，大家話有向財務公司借錢的人是不是要有心理準備，可能是生理準備比較好，我唔再講，留意日後文章。