星期一，香港股市大跌超過千點，但相比國內，仍然是跌幅輕微，當晚，有老友搵我，佢話收到一個樓盤，業主放棄開價，物業代理說買家不用還價，可以大膽開價，之後，給了一個市價，我老友見到價錢，覺得幾合理，問我如何處理。
我首先問那個單位質素是一般，抑或優質，如果是劣質單位就不用考慮，現在這個時勢仲攞劣貨出市場賣，唔通當買家是傻佬，如果是普通單位，表示賣家不是太等錢用，如果有興趣的話，不妨還一個良心價，大約10%折讓，如果可買可唔賣，就還一個無良價，大約折讓15%，如果該單位是優質單位，表示該位業主非常之等錢用，就要冷血一些，最低都要有20%折讓，做生意的人，大多數都是非常冷血，商人本色，業主早有心理準備，最怕就是冇人還價。
雖然有很多業界人士話，股市大冧，樓市變成避難所，所以，香港樓價不但不會下跌，還有機會創新高，我想他們不明白避難所是怎樣的，最簡單的就是要易入易出，牆壁又要夠厚，現在，在香港買樓要俾BSD，DSD，賣樓又要付SSD，絕對唔易入，更加唔易出，至於牆壁夠厚就要靠個人力量，借貸少，牆壁自然夠厚，而現在因為有SSD，不少業主要走都走唔到，又怎樣能夠有資格成為避難所。
既然樓市不能夠成為避難所，樓價就沒有上升理據，現在會買樓的人大多數非常冷血，當然明白這個道理，所以還價亦非常冷血，折讓20%就是最基本要求，不過，雖然是冷血，但亦有溫情一面，他們是不會要求一個長成交期，一般來說，一個月已經可以完成交易，否則，就輪到業主無興趣賣，我估計，如果港股不作急速反彈，冷血價就會成為新常態。
App下載
