上星期六，華僑永亨銀行邀請我和陸叔（陳永陸）一同演講，陸叔當然是講股票，我講樓市，在未開始時，陸叔同我講初時佢覺得很奇怪，紀惠有咁多物業，每一年租金收入都已經多過很多上市公司市值，點解我要叫人唔好買樓，雖然是細價樓，但一般人都會誤會我是淡友，而樓價近日仍然上升，我好似做咗衰人，但中環人有不同演繹，大多數中環人都知道細價樓已經在一個頂峰，現在樓價不跌，只因成交量太少，但亦沒有太多人追價買細價樓，當傳說中的不利因素出現，細價樓就會首當其衝，我現在叫人唔好買細價樓只是敢言，不過，如果沒有紀惠那麼多物業做後盾，就不會出現如此巨大震憾力。聽完陸叔講，成個心都舒服晒，我聽完陸叔演講，發覺陸叔才真正敢言，我只是夠膽講。
陸叔本來講深港通，誰不知陸叔放棄這個題目，佢話唔知道幾時通，無謂浪費大家時間，隨後，陸叔講了很多投資股票技巧，但最奇怪，陸叔亦都叫人暫時唔好買股票，因為A股市場風高浪急，國家救市唔知道救到幾時，香港股市一定會受到牽連，下跌兩,三千點是閒事，所以，無謂現在買股票，但又唔需要賣，因為賣走股票，就算真的下跌兩,三千點，都未必夠膽買番，當股市掉頭回升，正式邁向牛市時候，那些人就損失慘重。陸叔講得冇錯，在2008-9年，樓市下跌兩成之前，不少人賣走他們的自住物業，但沒有在低位購回，至今仍然租樓住，或者有部份人最近買入細價樓，所以，他們以前唱淡，現在唱好樓市，這點我明白，他們實在不能夠承受連輸兩次的結果。
陸叔以股票市場存在太多不明朗因素叫人暫時唔好買股票，我是因為細價樓下跌的因素太過明顯而叫人暫緩入市，兩者雖然異曲，但同工。陸叔最後講了一句話，叫人暫時唔好買股票其實只是空談，玩開股票的人又怎會聽在耳內，但求自己心安理得，我的「細價樓爆煲論」也是一樣，但求心安理得而已。陸叔已經應承到明報的「湯文亮會客室」，一定有好嘢聽。
App下載
