搞創科不如關注民生

　　友人睇到報章報導，預計將會有兩成中小企結業，失業人數會增加26萬，非常恐怖，希望政府可以關注香港經濟，唔好獨孤一味，只識得打擊樓市，我對友人話，你又不用太擔心，那些預測通常以最壞的情況顯示出來，這叫做語不驚人死不休，如果唔係，邊度會有咁多人關心他們的預測，我亦曾經試過用同樣方式話細價樓爆煲，不過就同人唔同命，俾人將軍將到我唔甩得身，最後惟有擺酒認輸，至於經濟轉壞，的確令人擔心，無可否認，政府是不會支持做生意的人，有物業的人，甚至要置那些人於死地，不過，香港人經歷多次巨變，每一次我們又會向前邁進一步，大家要擔心也擔心不來，香港政府只會見死不救。

　　有人非常唔同意，他們話CY搞了一個創科局，銳意將香港帶入高端科技領域，老實說，我唔知道創科局會起到什麼實質作用，或者，創科局創出一個局長及一班管治班子，以香港政府投入的資金，又沒有大企業支持，創科局實在難有作為，我們的所謂創新科技，在其他擁有高科技的國家眼中，是彫蟲小技，要稍有成就，必定要投入大量資源，十年之後，或者小有成就，而政府高姿態搞創科，但又忽略民生，如果兩成中小企結業，26萬人失業，就算創科搞到有國家級數都冇用，不如慳返一些資源，製造更多就業機會，亦有人話，搞創科，唔用得幾多錢，就當俾CY了卻心願，這點我明白，但近日從CY網誌所見，只有創科，其他就欠奉，就算失業人數增加，都是那些做生意的人不善經營，政府是沒有義務幫助他們，大家自求多福都冇用，一定要自己拯救自己，除非你的生意與創新科技有關。