睇好樓市的大淡友

　　有報紙稱我為樓市大淡友，我睇到之後，嚇了一跳，覺得受之有愧，或者報紙搞錯我是我宗兄，他現在手持六十億現金入市，以前因為宗兄睇淡樓市，遲遲不敢入市，而至財富愈積愈多，現在準備入市，不過，我在直覺上覺得宗兄是一名淡友，但大家唔好以為我嘲笑宗兄，而且愈多物業的人，愈睇淡樓市，那些沒有物業，準備買樓的人，才會一廂情願睇好樓市，宗兄持有多項貴重物業，在過去，睇淡樓市亦很正常，至於點解最近睇好樓市，我又不明白，所以，希望宗兄能夠我在明報的會客室賜教，但最好是有所行動才到會客室，否則，只是睇好，又有錢，又唔行動，很難向讀者交代。

　　至於點解話我係樓市太淡友，我又有多少不明白，今年至今，紀惠亦動用了六七億買物業，雖然略遜於往年，但在這個位高勢危的物業市場，肯作出如此銀碼投資，又沒有大規模放售行動，買入比賣出多很多，唔應該稱我為大淡友，不過，我睇番我自己的文章，不但應該被稱為大淡友，甚至超級大淡友都可以，或者，中庸一點的說法，我是睇好樓市的大淡友。

　　做生意就好似行軍打仗，不能夠一往直前，不顧身邊的危險，尤其是生意已上軌道，唔可能將整盆生意押下去，就算繼續進攻，都採取步步為營策略，就算有挫折，都不會傷及根基，步步為營是保守的進攻戰術，進攻不忘防守，既然是防守，就必須做出很多假設，一定會拖慢行軍速度，但總比全軍覆沒好。

　　現在的物業投資者與97年的時候不盡相同，不敢過份投資，亦不會追求最後的利潤，反而令到危機不會出現，或者會有人說，物業投資者是過份憂慮，物業市場根本沒有危機，很奇怪，當大家睇淡物業市場，不過份投資，樓市又真的不出現危機。這是一個相當矛盾理論，與我的「細價樓爆煲論」差不多，如果我不發表，細價樓真的是有機會爆煲，如今，細價樓沒有爆煲，我唔知道是否和「細價樓爆煲論」有關，不過我早已知道，發表之後爆煲機會大為減少，但我仍然選擇發表，希望細價樓唔會爆煲。