股市地震，樓市會怎樣

　　我平日睇林木地寫樓市五節棍，覺得非常有見地，但昨日我睇到林木地在五節棍中講，股市地震，樓市當殃，心裡想，林生點有可能犯了如此低級的錯誤，雖然有多宗撻訂個案實例，但始終掩蓋不住樓市大升之勢，莫非林生又好似同我一樣，同人打賭樓市爆煲，所以，極力唱衰樓市，連股市地震，樓市當殃的說話都可以講出來，今次真的是十年道行一朝喪，樓市不但是唱唔跌，就算股市地震，樓市只有大幅上升，而事實亦勝於雄辯，中原指樓在上星期又創新高，林生應該無話可說，老實說，我亦無話可說。

　　我相信中原指數創辦人曾淵滄博士昨日一定會有很多人問佢，股市地震，反映地產走勢的中原指數會大升，我唔知道曾博士怎樣回答，不過，現在中原指數制定人就話A股大跌，中央暴力救市，令致香港樓價大升，這點與林木地所說的完全相反，我都唔知道信那一個，如果我是一個普通市民，平時以知名人士評論作為投資方向，今次他們又應該怎樣做，那些撻了訂的人真的是死唔眼閉，明明樓市大升，竟然會撻訂，做業主當然開心，殺訂之後又可以提價，甚至唔需要考慮賣樓，因為早兩三個月，股市大時代來臨，他們話樓價飆升，到今日，股市崩潰，樓價升得仲勁，就這個情況來看，樓價是沒有可能下跌，咁又何需賣樓，無人賣樓，即是沒有供應，樓價更加只有升，我只是想知道，在什麼情況下樓價才會下跌。

　　每一次中原指數上升，都會有很多短訊傳給我，甚至會有一些挖苦的說話，昨日一個也沒有，我非常奇怪，掉轉頭打電話俾一個做三行的老友，佢話佢以魯班為師，亦謹記魯班師父所說的話，做門口時，要過得人，過得自己，所以，佢唔打電話俾我，我默言無語，突然記得，農曆六月十三日是魯班師父誕，我立刻坐地鐵到堅尼地城魯班廟上番注香，做分析員，最緊要有公信力，要過得人，過得自己。