逆向思維
事原我多年前有一段時間係做美息futures嘅Prop Trading. 當時同幾間大美資同大英資嘅同業叫做有偈傾,成日對點睇後市(即係當晚同未來幾日)作出交流。後尾發覺一個現象就係每當大家齊齊同view個陣,通常都係贏就贏少少,輸就輸鑊甘嘅。可恨就係通常個陣永遠都係無論基本經濟因素、技術走勢全部都話俾你聽你絕對只會做呢邊,你係搵唔到任何理由做另外果邊,最慘烈個次我個stop loss成返黎既價係比我預期輸多一倍錢。而家大家叫呢啲做crowded trade。自此以後每當我發現有相似情況,我一係就少少注大大聲,一係就坐另外果邊。亦可以話當你見到市場有大量最低防守力嘅持份者聚集埋一齊,你最好遠離佢哋,甚至同佢哋對著干。
你話唔係喎,期貨市場係零和遊戲,有咁多長盤就有一樣咁多短盤,邊有大細邊。錯!因為有hedger,個市上定落唔關佢哋事,反而因為我哋呢班短線炒家將個期市推到相對吸引嘅水位令佢啲hedge得更加爽。
二次世界大戰時期,有個美國半專家『好似話係諾貝爾獎經濟學家』檢驗同日本仔零式戰鬥機打完嘅艦上飛機,發現好多都係(比方)甲部位係彈痕纍纍而乙部份係無乜事,於是佢就下令幫啲飛機嘅乙部份加重裝甲,冇錯係乙部份而唔係甲部份因為佢相信係乙部份中彈嘅飛機已經變晒潛水艇喇。(投資界有條死剩種謬誤理論,不過同呢樣嘢無關)
每當市場一有大郁動係人都會問點解,呢個係人類對未知事物感到不安嘅天性。但基於世界上喺同一時間係有千百樣可以影響緊市場嘅嘢同時發生緊,而呢啲事情絕大部分係你同我永世都唔會知道嘅。所以大家往往用簡單思維,將兩件一前一後發生嘅事情強行定性為因果,用嚟應付老細,客人同埋自己,只因為"market
goes higher because there are more potential buyers than sellers"唔係一個可以被大家接受嘅解釋。所以我係睇個市點行,同埋睇個市對所謂好消息或者壞消息嘅反應而出手而唔係因為有好或者壞消息出手。唔知大家仲記唔記得係歐豬危機個陣係人都話掟歐羅但係歐羅無乜郁過,危機過後就反彈啦。