大、中、細交易員篇
大細係佢哋相對嘅年紀,同佢哋嘅成就、名譽、地位無關係。
大交易員行事係屬於小心謹慎個隻。『落場如出海捉魚:返唔到岸就捉到多多魚都係假。』就係佢嘅座右銘。又唔知係咪咁啱得咁橋,佢雖然唔可以話係the last man stand,但至今仍然乞立不倒。恭喜恭喜。唔知係唔係因為我哋呢行今日唔知聽日事,從佢嘅行為推論,佢一定認為擁有物業係long the market,係投機工具。佢一直都係好似草叢中餓狼等候機會出擊,通常佢搵到三、四十個巴仙,亦即係三、五、七年租佢就收水租屋等下轉。除左08年呢轉,早幾潮樓價彈升佢都有份。見佢搬嚟搬去就真係幾煩。最大隱憂係一旦被人退休咗又或者過幾年真正榮休,無張糧單搵鬼租間屋俾你。我認為報紙講到劏房租貴過天水圍只可以用無乜業主信劏房租客有租交嚟解釋。
中交易員係我識嘅人之中最緊跟潮流嘅表表者。佢六四後申請移民,九三年倒做到最後一刻賣樓移民去一個港人當年移民熱點,九六回歸香港後我見返佢,佢同我講:『移民果度點、點、點差,搵唔到食,啲樓又唔上。。。。最慘走甩咗香港過去幾年嘅物業升浪。我已經賣咗嗰面間屋,啱啱重鎚出擊咗層XY花園,一定要補償返過去幾年嘅損失。。。。。』我認為佢投資(同投機)係同市場跳tango,你feel倒音樂嘅節拍就如魚得水。快音樂叮咁多多就係帶舞,技驚四座。但如果你好唔好彩慢佢叮咁多多你就比人踩完左腳再踩右腳。好多時你輸錢係因為你太叻,快咗唔止係叮咁多多就出事。我會通常話佢聽:『牛頓投資都係咁上下級數。』去安慰佢地(當然更多時係安慰自己)
細交易員同佢唔係深交,佢知佢不幸97年代入咗新鴻基當年係青山公路一隻當紅炸子雞。應該係Ronold兄早前提起過個隻。後尾話交通唔方便搬返出市區,早兩年隻雞仲係潛緊水,近排有無走雞就唔知啦,人哋傷心事無謂追問啦,係無。而家賽後檢討,97年因為大家博短炒,所以相對普通單位嚟講大屋苑嘅premium係非常高。因此就算你不幸係97揸咗貨,只要唔係大屋苑,你點死都有個譜。就算過去幾年大牛市,幾年前你同發展商高水買咗一手特色戶都可能無乜好下場。
重點聲明:故事人物純屬虛構,如有雷同,實屬巧合。